Ամփոփելով նախընտրական քարոզչությունը՝ Դեմոկրատական կուսակցության առաջնորդ Արամ Սարգսյանն այսօր Պատանի հանդիսատեսի թատրոնում ասաց, որ իրենց այս ընթացքում հաջողվել է մեկ սկզբունք իրականացնել ՝«ես՝ մենք ենք» -ը աշխատեց. «Ես-ը հասկացավ, որ ինքը միայնակ ոչինչ չի կարող անել, ես-ը գումարած ես-ի գումարած ես-ի հավասար է ուժի»:
Պարոն Սարգսյանը հավաքվածներին բացատրեց, որ իրենք գնում են այն ճանապարհով, որը երկրում սոցիալական արդարություն է հաստատելու. «Եթե մնացինք պասիվ դիրքորոշման մեջ, ապա գործելու են նրանք, որոնք 20 տարվա ընթացքում կողոպտեցին ժողովրդին ու բերեցին այն ամենին, ինչ այսօր ունենք, ի՞նչ է պետք է հաշտվենք երկրում տիրող անարդարության հետ»:
Դեմկուսի ղեկավարի համոզմամբ, եթե թույլ տան նույն քաղաքական ուժերը կրկին կոալիցիա ձեւավորեն, ապա երկրում հետընթացն անխուսափելի է .«Իբր մի առաջընթաց էլ ունենք, հետընթաց է լինելու: Այն գործիչները, որոնք կանգնում են ամբիոնից ասում են՝ ժողովուրդ 5.000 դրամով մի վաճառեք ձեր ձայնը, հենց իրենք տանում են 10.000 դրամ են տալիս, ու նրանք կուսակցությունների առաջնորդներն են: Բավական է ժողովրդին մուրացկանության սովորեցնեք, ստեք» :
Նա հավաքվածներին հավատացրեց, որ ընտրություններում ոչ մի բան կանխորոշված չէ, ոչ մի ուժ հավատացած չէ, որ ինքը հաղթահարելու է 5 տոկոսի շեմը. « Կամ էլ իրենց երազած 20 տոկոսը, որովհետեւ ժողովուրդը հիասթափված է»: Դեմկուսի համամասնական թեկնածու՝ մետրոպոլիենի մեքենավար Վարդան Երանոսյանն էլ մեր զրույցում ասաց, որ ԱԺ-ում աշխատավորների պակաս կա, հատկապես շինարարների. «Որովհետեւ այսօր ամբողջ հանրապետությունում մեծ թափով շինարարություն է գնում, որեւէ մեկը պաշտպանե՞լ է շինարարի իրավունքները»:
Կարդացեք նաև
Արփինե ՍԻՄՈՆՅԱՆ
