Մալաթիայից տասնհինգ-քսան րոպե հեռավորության վրա, լեռներում գտնվում է քրդաբնակ Չամռլու Վենք գյուղը: Ժամանակին այն, հավանաբար, կոչվել է ուղղակի Վանք, քանի որ այստեղ է գտնվել Սուրբ Գրիգոր Լուսավորիչ վանքը, որից այժմ մնացել է մի փոքր մատուռ: Մալաթիահայերի «Հայդար» միության Մալաթիայի ներկայացուցիչ Սերդար Բոյաջին ասաց, որ իր պապերը պատմում էին, թե ժամանակին Սուրբ Գրիգոր Լուսավորիչի տոնին, որը տոնվում է օգոստոսին, ընտանիքներով գալիս էին այստեղ` ուխատգնացության, գիշերները վրան էին դնում սարի լանջերին, ուրախանում, խնջույքներ, խաղեր կազմակերպում, տոնում Լուսավորչի տոնը:
Այժմ այդտեղ մի քարուքանդ շինություն է, որը նույնիսկ մատուռ անվանելը դժվար է: Այդ շինությանն անմիջապես կպած մի ցածր, անշուք կառույց կա, որը տեղաբնակ քրդերի համար աղոթատեղի է ծառայում:
Իսկ մատուտի ավերակներից քիչ ներքեւ մատուռից գողացված քարերով կիսակառույց մի շինություն կա:
Կարդացեք նաև
Մեզ ուղեկցող Սերդար Բոյաջին ասաց, որ նույն ծրագրով, որով պիտի նորոգվի եւ մշակույթային կենտրոն դառնա Մալաթիայի Սուրբ Երրորդություն եկեղեցին, նորոգվելու է եւ որպես մշակությաին հուշարձան, կոթող է մնալու սերունդներին նաեւ այս` Գրիգոր Լուսավորիչ վանքից մնացած կիսաքանդ մատուռը:
Ներկայումս այս գյուղը քրդական գյուղ է, որի բնակիչները հիշում էին իրենց պապերի պատմություններն այն մասին, որ այստեղ հայեր են ապրել:
Չամռլու անունը գյուղին կպել է իր ցեխոտության պատճառով: Անգամ տաք եւ արեւոտ եղանակին այս գյուղում կպչուն ցեխ կա: Ցեխը հենց թուրքերեն «չամուռն» է:
Մելանյա ԲԱՐՍԵՂՅԱՆ
