Նախօրեի գիշերը Տավուշի մարզի Չինարի եւ Բերդավան գյուղերի մոտ տեղակայված դիրքերի մոտ ադրբեջանական երկու դիվերսիոն խմբերի հարձակումներից հետո հայ-ադրբեջանական սահմանին իրավիճակը շարունակում է ծայրահեղ լարված մնալ։ Երեկ կեսօրին հակառակորդն անընդմեջ գնդակոծել է Մովսես գյուղի մոտ գտնվող հայկական դիրքերը։ Գյուղի բնակիչները երեկ ողջ օրն անցկացրել են կամ տներում, կամ նկուղներում՝ ավազով լի պարկերի պատնեշների ետեւում։ Գյուղապետ Լյուդվիգ Ապերյանը երեկ մեր թղթակցին ասել է, որ ամեն ինչ նորմալ է, գյուղացիները նման կրակոցների սովոր են, մինչդեռ գյուղի բնակիչները պատմեցին, որ ինչքան էլ նախկինում տեսել են հրադադարի ռեժիմի նման խախտումներ, դա իրենց համար նորմալ չի կարող լինել։ «Վախի մեջ ենք։ Ա՛յ հենց հիմա էլ կրակում են։ Լսո՞ւմ եք։ Մարդիկ տներում փակված են, ես հիմա դուրս եմ եկել, տեսնեմ՝ ինչ կա, նորից գնամ տուն»,- մեր թղթակցին հեռախոսով ասել է գյուղի բնակիչներից մեկը՝ հավելելով. «Ամեն դեպքում շատ խառը իրավիճակ է։ Մենք հիմա տներից դուրս չենք գա։ Գյուլլեն քոռ ա, ինչ իմանաս, թե ուր կընկնի»։ Նա նաեւ պատմել է, որ աննախադեպ ակտիվ են ադրբեջանական կողմի կրակահերթերը, իսկ հայկական կողմը հակահարված է տալիս անհամեմատ «համեստորեն»։
«Հայկական ժամանակ»
