Հայրենական արտադրողների միության նախագահ Վազգեն Սաֆարյանն այսօր «Փաստարկ» ակումբում լրագրողների հետ հանդիպման ժամանակ կառավարության ծրագրին բավականին դրական գնահատական տվեց: Մասնավորապես, ըստ պարոն Սաֆարյանի, այս անգամ կառավարության ծրագիրը հեռանկարային է եւ քայլ է կատարվում ժամանակի մեջ վերցնել առաջիկա տարիների զարգացումը: Բացի այս, միության նախագահի խոսքերով` կան նոր ձեռքբերումներ` պետությունն այսուհետ պատասխանատու է լինելու բարենպաստ բիզնես միջավայր ստեղծելու համար.«Եվ ոչ միայն խոսքով, նաեւ ներգրավելու է մասնավոր հատվածին արդյունաբերական քաղաքականության մեջ»:
Պարոն Սաֆարյանի խոսքերով, կառավարությունը ի վիճակի է իրականացնել ծրագիրը, բայց այլ հարց է՝ արդյոք դա մեր հասարակությանը կբավարարի՞: «Մեզ համար ընկալելի չէ համախառն ներքին արդյունքի եւ հարկերի համամասնություն, որն այսօր 17 տոկոս է եւ ակնկալվում է տարեկան ավելացնել 0.3-0.4 տոկոս ավելացում: Սա նշանակում է կառավարությունը չի կարողանում իր վրա վերցնել ստվերը կրճատելու պատասխանատվությունը: Պիտի ասեմ, որ Վրաստանում համախառն ներքին արդյունքի եւ հարկերի համամասնությունը 25 տոկոս է: Փաստորեն մենք 5-րդ տարվա վերջում նոր կարող ենք ակնկալել, որ կարող է հասնենք 2 տոկոս ավելացման հարկերի եւ համախառն ներքին արդյունքի»:
Վազգեն Սաֆարյանը նշեց, որ պետք է արդյունաբերության ոլորտին ուշադրություն դարձնել, մասնավորապես «Նաիրիտ» գործարանին, որը միության նախագահի խոսքերով`երկնքից ընկած նվեր է ժողովրդի համար, բայց կառավարությունը չի կարողանում աշխատեցնել: «Նաիրիտի» վերածննդի համար, մասնագետը խորհուրդ է տալիս զարգացած երկրներից ներդրողներ ներգրավել, այլ ոչ թե տարբեր միջազգային բանկերից տրված վարկերի հաշվին աշխատեցնել:
Կարդացեք նաև
Նելլի ԲԱԲԱՅԱՆ
