Այսօր Անիի տարածաշրջանի Քարաբերդ գյուղում հուշարձան կանգնեցրրին արցախյան պատերազմի հերոսներից մեկի`Հակոբ Իսպիրյանի հիշատակին: Եվ մինչ մարզի բարձրաստիճան պաշտոնյաները` Շիրակի հոգևոր թեմի առաջնորդը, դատախազը, ոստիկանապետը, ազատամարտիկները հարգում էին հերոսի հիշատակը, գյուղացիները, լրագրողներին տեսնելուն պես, իրենց բողոքն էին ներկայացնում կառավարությունից:
Վերջիններիս ասելով` իրենք գյուղովի ձայն են տվել Հանրապետական կուսակցությանը , որպեսզիՀՀԿ-ականները կարգի բերեն Քարաբերդ-Մարալիկ ավտոճանապարհը, սակայն «շան տեղ դնող չի եղել»: «Դուք էդ ճանապարհով եկաք, բա դա ճանապա՞րհ է, ուղեղի ցնցում ես ստանում, նույնիսկ գծատերերն են հրաժարվում այստեղ մարշրուտկա ուղարկելուց: Ընտրություններից առաջ էն Սամվել Նիկոյանին նամակ գրեցինք, նա էլ խոստացավ ճանապարհներին տեր կագնել, սարքել, մենք էլ հավատացինք ու մարդկայնորեն ընդառաջեցինք Հանրապետական կուսակցությանը: Բայց նրանք մեզ խաբեցին, էսքանից հետո էլ ինչի՞ն հավատանք, հավատանք, որ պիտի փոխվե՞ք: Մի բան ենք նախազգուշացնելու. ԱԺ ընտրություններին հաջորդելու են նախագահական ընտրությունները, եթե մինչ այդ մեր ճանապարհները չվերանորոգեցիք, ուրեմն գյուղովի զրո ձայն ենք խոստանում Սերժ Սարգսյանին, մենք կբոյկոտենք ընտրությունները, հո ձայն փախցնելով չի՞»,- սպառնացին մի խումբ գյուղացիներ: Ի դեպ, այդ ճանապարհով երթևեկելը իրոք հերոսություն էր, լրագրողների մոտ ևս սրտխառնոց առաջացավ, իսկ միկրովատոբուսը քիչ էր մնացել ջարդուխուրդ լիներ:
Նունե ԱՐԵՎՇԱՏՅԱՆ
Կարդացեք նաև
