«Խորան» կրոնական կառուցի գործունեությունից տուժած մեկը գտնվում է Սովետաշենի հոգեբուժարանում: Այդ մասին «Երկու երես» մամուլի ակումբում այսօր ասաց Միացյալ Երիտասարդական Լիգա (ՄԵԼ) շարժման համանախագահ Սեւակ Հովհաննիսյանը: «Վերջերս մեզ հետ կապվել էր մի կին եւ հայտնել, որ հարսի ազդեցությամբ որդին ներգրավվել է «Խորանի» հավաքներում եւ որոշ ժամանակ անց ստացել հոգեկան խանգարումներ»,-հավելեց նա:
Aravot.am-ի հետ զրույցում Սեւակ Հովհաննիսյանն ասաց, որ ըստ «Խորանի» անդամների հայտնած տեղեկությունների՝ «Խորանը» ֆինանսավորվում է ԱՄՆ նախկին կոնգրեսական Ջոն Փասսլինի կողմից, ով հայտնի է հակահայկական, մասնավորապես՝ Ցեղասպանությունը ժխտող ելույթներով. «Տեղեկությունը հայտնողներն այդ մասին իմացել են «Խորանի» ղեկավար Հրաչյա Խաչատրյանի եւ Փասսլինի հեռախոսազրույցից: «Խորանը» հիմնադրելու հարցում Փասսլինն աջակցել է Խաչատրյանին, ով ներկայումս իր կառույցի անդամներից կորզած գումարների տասը տոկոսը յուրաքանչյուր ամիս փոխանցում է նրա հաշվեհամարին: Հստակ չեմ կարող ասել, թե որքան, բայց ինձ կաշառք առաջարկելուց ասում էին՝ ինչ թիվ ուզես՝ կտանք»:
Հովհաննիսյանը հավելեց, որ «Խորանից» կրկին սպառնացել են վնասել ՄԵԼ-ի անդամներին:
Լուիզա ՍՈՒՔԻԱՍՅԱՆ
