Սուրբ Հովհաննես եկեղեցու հոգևոր սպասավոր Տեր Շմավոն քահանան և ազգագրագետ Սամվել Մկրտչյանն այսօր «Երկու երես» ակումբում խոսեցին Ս. Մարիամ Աստվածածնի վերափոխման տոնի՝ խաղողօրհնեքի մասին:
Տեր Շմավոն քահանան հիշատակեց, որ Մարիամ Աստվածածնի մահվան այս իրողությունը կոչում են Աստվածածնի ննջում: Հովհաննես առաքյալը իր տուն տարավ Մարիամին, խնամեց նրան շուրջ 30 տարի, հետագայում Գաբրիել հրեշտակապետը նրա մահվան լուրը բերեց, և Աստվածածինը ննջեց: Տոնը նշվելու է օգոստոսին 12-ին՝ կիրակի օրը, այն տաղավար տոներից 4-րդն է, այդ օրը մարդիկ գնում են գերեզման և օրհնություն կատարում: Աստծո օրհնությունը ոչ միայն տաճարի մեջ է, այլև տաճարից դուրս:
«Աստվածածնի վերափոխման տոնը ամենագեղեցիկ ու սիրված տոներից մեկն է, Մարիամ Աստվածածնին դիմում ենք որպես մայր և Աստծուն հավասար սիրում և պաշտում : Ժամանակը եկավ և բոլոր քրիստոնեական եկեղեցիները սկսեցին նշել և կատարել խաղողօրհնեքի կարգը: Այդ օրը օրհնվում է մեր այգիների ամբողջ պտղաբերությունը, ոչ միայն խաղողի, այլև բոլոր մրգերի»,- հայտնեց հոգեւորականը: Քահանան նշեց, որ խաղող դեռևս չի գնել ու չի ճաշակել, այն չի քաղցրացել՝ քանզի դեռ օրհնված չէ:
Ըստ ազգագրագետի՝ Աստվածածնին վերաբերող շատ տոներ ունենք, բայց սա ամենագեղեցիկն է: Շատերի մոտ այն տարածված է որպես խաղողի զատիկ, պտուղների օրհնանքի տոն, հետագայում այդ անվանումները «անկում ապրեցին».
Կարդացեք նաև
«Տոնը համաժողովրդական բնույթ ունի, այն տարածված է կանանց շրջանում և հիմնականում տարեց սերունդն է պահպանում և նշում նրա բուն ավանդույթները: Խաղողօրհնեքը առաջ տոնվել է այգիներում, մարդիկ թաշկինակների մեջ կապված պտուղը տարել են իրենց տները: Այս և մյուս ժողովրդական տոների հիմքում հիմնականում արտացոլված է եղել բերքահավաքը, երկրագործությունը»,- մեկնաբանում է ազգագրագետը
Քահանան էլ ասուլիսի վերջում փաստեց, որ այդ օրը առանձնահատուկ է ուխտագնացությամբ՝ մարդիկ մատաղ և աղոթք են անում:
Անժելա ՇԱՀՈՒՄՅԱՆ
