Օրերս մի խումբ մտավորականներ դիմել էին ԱԺ պատգամավոր Ռուբեն Հայրապետյանին եւ խնդրել, նույնիսկ պահանջել վայր չդնել պատգամավորական մանդատը: Ռուբեն Հայրապետյանին ձայն տված գիտնականները կոչ են արել տեր կանգնել իրենց կողմից պատգամավորին տրված քվեին եւ հորդորել` որպես ԱԺ պատգամավոր իրենց կողքին լինի:
Երեկ ռազմական բժիշկ Վահե Ավետյանի մահվան 40-րդ օրվա կապակցությամբ տեղի ունեցած մոմավառությանը ներկա էր նաեւ «Ժառանգություն» կուսակցության անդամ Անահիտ Բախշյանը, որը Aravot.am-ի հետ զրույցում գիտնականների հայտարարության վերաբերյալ հետեւյալն ասաց. «Ես ընդհանրապես բազմակարծությունը հարգող մարդ եմ եւ հանդուրժող եմ: Եթե դա ընդամենը որպես կարծիք դիտեի, կասեի`այո, դա էլ իրենց կարծիքն է: Բայց այս պարագայում, ինչպես ասում են, երկու կարծիք լինել չի կարող: Ինձ համար այդ մարդկանց տեսակետը, ի՞նչ ասեմ, էդ խզբզոցը, որ գրել են, իրենց մասին, մեղմ ասած, լավ չի խոսում: Լավ է, որ չեմ ճանաչում այդ մարդկանց»:
Հիշեցնենք, որ ԱԺ պատգամավոր Ռուբեն Հայրապետյանին պատկանող «Հարսնաքար» ռեստորանում անվտանգության աշխատակիցների կողմից դաժան ծեծի ենթարկված ռազմական բժիշկ Վահե Ավետյանի մահվանից հետո Ռուբեն Հայրապետյանը հայտարարեց, որ ցանկանում է հրաժարվել պատգամավորական մանդատից, սակայն այդ հարցը ԱԺ-ում դեռեւս չի քննարկվել:
Նելլի ԲԱԲԱՅԱՆ
Կարդացեք նաև
