Վրացիները սեփականել են «գինու բնօրրան» կարգավիճակը, Եվրամիությունն էլ վավերացրել է Վրաստանի հայտը: Եվ սա այն դեպքում երբ աշխարհի ամենահին գինեգործարանը Արենիում է. հայկական գինեգործական ավանդույթներն էլ շուրջ 6000 տարեկան են:
Aravot.am-ի հետ զրույցում Հայաստանի գինեգործների միության նախագահ Ավագ Հարությունյանը ասաց, որ հույս չունի թե հարցը ինչ-որ կերպ հօգուտ Հայաստանի կփոխվի. «Պետական մոտեցում է հարկավոր, որը բացակայում է: Վրացիները սկզբում աշխատում էին ֆիզիկական անձանց ու կազմակերպությունների, իսկ 2005-ից՝ արդեն պետական մակարդակով, պետական ողջ ապարատը լծված էր վրացական գինու առաջմղման գործին, բոլոր դիվանագիտական ճանապարհներով, առեւտրական, միջազգային կապերով, դեսպանաներով կազմակերպում էին միջոցառումներ, գրանցում բոլոր հնարավոր ու անհնար անունները, այդ թվում՝ տասնյակ անուններ, որոնք սերտ առնչություն ունեն Հայաստանի մշակութային ժառանգության հետ»:
Կարդացեք նաև
Իսկ առաջիկայում ի՞նչ քայլեր պիտի արվեն հայաստանյան կողմից իրավիճակը գոնե մեղմելու առումով:
«Ցավոք Հայաստանում ամեն ինչ թողնված է անհատների ուսերին: Կրկնում եմ՝ պետական մոտեցում է հարկավոր, պետական քաղաքականություն, պետականորեն պետք է շահագրգիռ լինել: Գինու բիզնեսը, բացառությամբ մեկ-երկու դեպքի, որոնց հետեւում աստղեր են կամ հարուստ մարդիկ, ավելի շատ մշակութային երեւույթ է, իմիջային, պետության դեմքը ներկայացնող այցեքարտ, սա պետության խնդիր է, պետությունը պիտի նման հարցերով զբաղվի եւ գինու կողքին կանգնի»,- համոզված է Հայաստանի թիվ մեկ գինեգործը:
Գոհար ՀԱԿՈԲՅԱՆ
