Մելինե Դալուզյանը ուսումնամարզական հավաքների ժամանակ Տիգրան Մարտիրոսյանի հետ միասին ամենից լավ մարզավիճակում էր: Սակայն նա էլ Լոնդոնում բառիս բուն իմաստով տապալվեց:
Հայաստանի ծանրամարտի ֆեդերացիայի նախագահ Սամվել Խաչատրյանը նրա պարագայում էլ բացատրություն չի գտնում: «Տղամարդկանց եւ կանանց հավաքականների անդամներից ուսումնամարզական հավաքների ողջ ընթացքում Տիգրան Մարտիրոսյանի հետ միասին Մելինեն ամենալավ մարզավիճակ ուներ: Հռիփսիմե Խուրշուդյանի մասին կխոսեմ ավելի ուշ, – Aravot.am.-ին տված բացառիկ հարցազրույցում ասաց Հայաստանի ծանրամարտի ֆեդերացիայի նախագահ Սամվել Խաչատրյանը: – Վերջին մարզումներին նա պոկումում մեկ մարզման ժամանակ երեք անգամ հաջորդաբար բարձրացրել է 115 կիլոգրամը, հրել 150 կգ-ն, իսկ 155-ը վերցրել կրծքին: Լոնդոնում, նախավարժանքի սրահում մկանները տաքացնելիս Մելինեն այնքան թեթեւ վերցրեց 110 կիլոգրամը, որ մտածեցի, թե մրցահարթակում կբարձրացնի անգամ 118-119 կիլոգրամ: Բայց 111 կգիլոգրամը դժվարությամբ բարձրացնելուց հետո երկու անգամ տապալվեց 115 կիլոգրամում: Կատարվածից շփոթվել էր նույնիսկ նրա անձնական ու հավաքականի գլխավոր մարզիչ Արտաշես Ներսիսյանը: Իսկ Մելինեն ասում էր, թե մոտենում է քաշին, բռնում ձողը ու թվում է, թե գործիքը մեկ տոննա է: Նույն իրավիճակը կրկնվեց նաեւ հրումում: Վարժասրահում էլի մկանները տաքացնում էր 130 կիլոգրամով: Բայց պատասխանատու պահին երկու անգամ մոտեցավ 140 կգ-ին ու տակից դուրս գալ չկարողացավ: Ստեղծված իրավիճակից դուրս գալու համար երրորդ մոտեցման համար քաշը բարձրացրեց եւս երկու կիլոգրամով՝ 142, ու նորից անհաջող մոտեցում կատարեց: Ինչո՞վ բացատրել այդ ամենը, անկեղծ եմ ասում, պատասխան չեմ գտնում: Անգամ մտածում էինք, թե դահլիճում հիպնոս անող կա նստած», – պատմեց ֆեդերացիայի նախագահը:
Աշոտ ՀԱԿՈԲՅԱՆ
