Նախկին բարձրաստիճան պաշտոնյան իր հարազատ քաղաքում նույնիսկ մի տնակ չունի
Չնայած թեկնածուների՝ գույքի եւ եկամուտների մասին հայտարարագրերը երբեմն ոչ ճշգրիտ պատկերն են արտահայտում նրանց իրական ունեցվածքի ու դրամական միջոցների մասին, այդուհանդերձ, ընթերցելով Գյումրու քաղաքապետի 4 թեկնածուների ներկայացրած փաստաթղթերը՝ տպավորություն ենք ստանում, որ ամենահարուստը ԲՀԿ-ական Սամվել Բալասանյանն է, ամենաաղքատը` Լենինականի Շիրակի շրջկոմի առաջին քարտուղար Սպարտակ Պետրոսյանը, իսկ ամենաազնիվը՝ 44-ամյա Անդրանիկ Ավետիսյանն է:
ԲՀԿ-ական Սամվել Բալասանյանի հայտարարագրում գրեթե նույն տվյալներ են, ինչ նա ամիսներ առաջ ներկայացրել էր ԱԺ պատգամավոր դառնալիս: Գործարար պատգամավորի գույքը 5 ամսվա ընթացքում ոչ ավելացել է, ոչ էլ՝ պակասել: Նա մի շարք շենք-շինությունների, անասնագոմի ու հողատարածքի համասեփականատեր է: «Անշարժ գույքի» տակ հայտարարագրված են նրա տները, գարեջրի գործարանները, «Պոլոզ Մուկուչ» գինետունը, Ազատանի վարչական սահմաններում գտնվող 2,336 հա հողամասն ու նույն գյուղում գտնվող անասնաշենքը՝ 3224,28 քառ. մետր տարածքով: Նրա տարեկան եկամուտը ապահովում է Ազգային ժողովը՝ փոխանցելով 3 միլիոն 800 հազար դրամ: Թերեւս միակ նորությունն այն է, որ վերջին 5 ամսվա ընթացքում կես միլիոն դրամով ավելացել է Սամվել Բալասանյանի եկամուտը. եթե ԱԺ պատգամավոր դառնալիս՝ նա ձեռքի տակ ուներ 7 միլիոն 500 հազար դրամ եւ 22 հազար ԱՄՆ դոլար կանխիկ գումար, ապա հիմա այն դարձել է 8 միլիոն դրամ ու 22 հազար դոլար: Նշենք, որ նրա հայտարարագրում ամենացնցողն ու ուշագրավը դարն անցած Մ-2140 մակնիշի «Մոսկվիչն» է, որն արտադրվել է 1977 թվականին եւ ամենայն հավանականությամբ՝ կորցրել է իր պիտանիությունը, դուրս է եկել կիրառությունից: Մեր ընթերցողներին ԱԺ ընտրությունների նախաշեմին տեղեկացրել էինք, որ գործարար պատգամավորն առնվազն $140 հազար արժողությամբ BMW X 6 թանկարժեք մեքենայով է շրջում:
Ի տարբերություն ԱԺ պատգամավորի` ամենաերիտասարդ թեկնածուն՝ Անդրանիկ Ավետիսյանը, որը փաստացի գրանցված, բայց չգործող «Ադո Վուլֆ» ՓԲԸ-ի տնօրենն է, ամեն ինչ իր անունով է դարձրել` թե բնակարանները, թե մեքենաները: Նա միանձնյա սեփականատեր է այս ամենի: Թեկնածուն Գյումրու Անի թաղամասի Տրդատ Ճարտարապետ փողոցում երկու բնակարան ունի, մեկ բնակարան՝ 26 Կոմիսարների փողոցում, ունի երկու մեքենա, մեկը փոքր-ինչ ժամանակակից՝ 1993 թվականի արտադրության «Ֆորդ մոնդեո 2.OI» մակնիշի, որն, ըստ մասնագետների, մոտավորապես, $3500 արժե, իսկ մյուսն ավելի հին՝ 1989 թվականի արտադրության «Վազ 21063» մակնիշի: Վերջինը, մասնագետների բնութագրելով, ՙսովետական «06» է, որը առավելագույնը $2 հազար դոլար արժե: Այս թեկնածուն փողից եւս նեղություն չի կրում. նրա դրամական միջոցները հայտարարագիրը ներկայացնելու պահին կազմում են 10.000.000 ՀՀ դրամ, $44.000 եւ 17.000 եվրո:
Այս առումով բավականին համեստ է Շիրակի մարզպետարանի ֆինանսատնտեսական վարչության պետի տեղակալ, դաշնակցական Հովսեփ Սիմոնյանը, որը հայտարարագրում նշել է, որ բնակվում է տնակում: Հայտարարագիրը ներկայացնելու պահին ձեռքի տակ ունեցել է 3 միլիոն ՀՀ դրամ եւ 3 հազար ԱՄՆ դոլար, իսկ տարեկան եկամուտը ապահովում է կառավարությունը՝ որպես աշխատավարձ փոխանցելով 2 միլիոն 454 հազար 610 դրամ: Դաշնակցական ընկերոջ տրանսպորտային միջոցը 2004 թվականին արտադրված «Վազ 2110» մակնիշի մեքենա է, այսինքն, ըստ մասնագետների, սա «սովետական դիսյատկա» է՝ «Ժիգուլու» սերնդից, եւ առնվազն կարժենա $4000-5000 դոլար: Իսկ ահա կոմունիստների ժամանակ Շիրակի շրջկոմի առաջին քարտուղար աշխատած Սպարտակ Պետրոսյանը, որը ԱՄՆ-ում մշտական բնակվելու իրավունք, միգուցե եւ քաղաքացիություն ունի, քանի որ քաղաքական ապաստան է ստացել ԱՄՆ կառավարությունից, կարծես թե հայրենիքում ոչինչ չունի: Նրա ամբողջ ունեցվածքը Զովունի գյուղում ունեցած 0,0700 քառակուսի մետր հողամասն է՝ տնակով, եւ $5000:
ՆՈՒՆԵ ԱՐԵՎՇԱՏՅԱՆ
«Առավոտ» օրաթերթ
