«Սպորտը` հանուն հավասար հնարավորությունների» նշանաբանով անցկացված սեղանի թենիսի մրցման հաղթողների եւ մրցանակակիրների պարգեւատրման ժամանակ ներկաներին այս կարգախոսը հիշեցրեց «Հույսի կամուրջ» ՀԿ ղեկավար Սուսաննա Թադեւոսյանը.«Հույսի կամուրջը», լինելով Հայաստանում հաշմանդամության խնդիրներով ամենից շատ զբաղվող կազմակերպություններից մեկը, շատ է կարեւորում վերաբերմունքը: Եւ հասարակության վերաբերմունքը փոխելու համար օգտագործում է բազմաթիվ միջոցներ: Դրանցից մեկն էլ սպորտն է: Սպորտը Հայաստանում հավասար հնարավորությունների գաղափարը քարոզելու լավագույն միջոցն է: Արդեն յոթերորդ տարին է` մենք տարբեր գործընկերների հետ կազմակերպում ենք «Սպորտը` հանուն հավասար հնարավորությունների» նշանաբանով մրցումներ: Եվ շատ կարեւոր է լրատվամիջոցների մասնակցությունը դրանց, որոնք այնուհետեւ այդ գաղափարը սփռում են հասարակություն` փոխելու վերաբերմունքը: Մեր քարոզարշավների կարգախոսներից է. «Քո վերաբերմունքն ավելի է ազդում իմ կյանքի վրա, քան իմ հաշմանդամությունը»: Եվ այս ոգով էլ ես շնորհակալություն եմ հայտնում այս մրցման բոլոր մասնակիցներին», – ասաց Սուսաննա Թադեւոսյանը:
Աշոտ ՀԱԿՈԲՅԱՆ
