Այսօր Մամուլի ազգային ակումբում Սփյուռքի առաջատար լրատվամիջոցների մի շարք ներկայացուցիչներ խոսեցին վերջերս ավարտված Լրագրողների 6-րդ համաժողովից եւ Սփյուռքի մամուլի խնդիրներից:
«Ժամանակ» օրաթերթի գլխավոր խմբագիր Արա Քոչունյանն ասաց, որ մասնակցել է նախորդ բոլոր համաժողովներին. «Հայաստանի մասին պատկերացումները համաժողովների միջոցով չէ, որ կազմում ենք, բայց դրանք հնարավորություն տվեցին համախմբվել եւ խնդիրներ քննարկել: Աշխատանքները մեծ էին, սակայն ի տարբերություն նախորդ համաժողովի՝ այս անգամ ուշագրավ բացականեր կային, մինչդեռ ներկա էին սփյուռքի առաջատար լրատվամիջոցների ներկայացուցիչները: Նախորդ համաժողովի ընթացքում Արցախի ղեկավարության կողմից առանձնահատուկ վերաբերմունքի արժանացանք, անգամ մեկնեցինք գյուղեր եւ այցելեցինք զորամաս: 6-րդ համաժողովում Հայաստանի ղեկավարության կողմից նույնպես ցույց տրվեց մեծ պատրաստակամություն: Սփյուռքում կարծիք կա, թե Հայաստանի ղեկավարությունն անտարբեր է մեր հանդեպ, բայց հակառակն ապացուցվեց»:
Խոսելով թերթից՝ Քոչունյանն ասաց, որ հակառակ քաղաքական պայմաններին՝ «Ժամանակը» շարունակում է լույս տեսնել Թուրքիայում. «Խոսքի ազատության առումով կան որոշակի կաղապարներ, բայց եվրաինտեգրման ճանապարհին Թուրքիայի կատարած բարեփոխումները դրական են անդրադառնում մեզ վրա: Հայկական հարցը Թուրքիայում դադարել է տաբու լինել. որոշ անհատներ բարձրաձայնում են այդ մասին, բայց Թուրքիան գիտակցում է , որ հարցը կարող է փաստացի քննել հենց Հայաստանի հետ»:
Կարդացեք նաև
Թուրքիայի ազգային փոքրամասնությունների վերաբերյալ Քոչունյանը հավելեց, որ դրանք հազիվ երկրի բնակչության մեկ տոկոսն են կազմում. «Միեւնույն ժամանակ՝ փոքրամասնությունների, այսպես կոչված, որակական ներկայությունը բյուրեղացել է եւ թույլ է տալիս հստակ դիրքորոշումներ հայտնել»:
«Ազդակ» օրաթերթի գլխավոր խմբագիր Շահան Գանտահարյանը փաստեց, որ Լիբանանը միակ արաբական երկիրն է, որը ճանաչել է Ցեղասպանությունը. «Այդ առումով Անկարան դժվարանում է Լիբանանում ժխտողական քայլեր ձեռնարկել: Խնդիրը Ղարաբաղյան հարցում է, քանի որ թուրք-ադրբեջանական կողմը ապատեղեկատվություն է տարածում: Սիրիացիները հասկանում են, որ երկրի մերձեցումը Թուրքիայի հետ սուտ է: Ճիշտ է, Թուրքիան ապաստան է տալիս Սիրիայի փախստականներին, բայց հասկանում է, որ քրդական գործոնը մեծ վտանգ է ներկայացնում»:
Լուիզա ՍՈՒՔԻԱՍՅԱՆ
