Արդեն երկրորդ օրն է, ինչ Ազգային ժողովի մի խումբ պատգամավորներ՝ մարդու իրավունքների եւ հանրային հարցերի մշտական հանձնաժողովի եւ եվրոինտեգրման հարցերի մշտական հանձնաժողովների անդամները եւ հանձնաժողովների նախագահները այցելում են ազատազրկման վայրեր: Այցելության նպատակը ազատազրկման վայրերում մարդկանց ապրելու պայմաններին ծանոթանալն է, տեղում տեսնել, եւ լսել, թե ինչ խնդիրներ ունեն ազատազրկվածները:Երկու հանձնաժողովները նոյեմբերի 20-ին պատրաստվում են անցկացնել համատեղ լսումներ, որի թեման լինելու է, թե ազատազրկման վայրերում կալանավորների պայմանները որքանով են համապատասխանում Եվրոպական Միության ստանդարտներին:
ՀՀ ԱԺ մարդու իրավունքների եւ հանրային հարցերի մշտական հանձնաժողովի փոխնախագահ Մարգարիտ Եսայանը Aravot.am-ի հետ զրույցում ասաց, որ բավականին բաց հնարավորություն ունեցան տեղում ծանոթանալ իրենց հուզող շատ խնդիրների, զրուցեցին ազատազրկվածների հետ, ականջալուր եղան նրանց խնդիրներին, որոնց մասին պատրաստվում է ելույթ ունենալ լսումների ժամանակ: Մեր զրուցակիցը համոզած է, որ այստեղ կա խնդիր, եւ ՀՀ ՄԻՊ տարեկան զեկույցներում այդ խնդիրը բարձրացվում է. «Մենք տեսանք, թե ինչպես 12 հոգու համար նախատեսված խցերում բնակվում է 24 մարդ եւ քնում են նրանք հերթով, խիստ ծանր պայմաններում: Հուսով եմ, լսումներն արդյունավետ կլինեն եւ մենք հնարավորություն կունենանք ինչ-որ չափով օգտակար լինել առկա խնդիրների լուծման ճանապարհին»:
Տիկին Եսայանը նաեւ հավելեց, որ ազատազրկման վայրերի խնդիրների մասին եւ խորհրդարանում, եւ տարբեր քննարկումների ժամանակ մշտապես խոսել է արդարադատության նախարարը. «Խնդիրները բոլորին հայտնի են եւ հենց դրանց լուծման նպատակով նախապատրաստվում է օրենսդրական փոփոխությունների փաթեթ, որի ընդունման դեպքում փոփոխություններն ավելի արդյունավետ կլինեն: Ազատազրկման վայրերի գերծանրաբեռնվածության խնդիրը լուծելու նպատակով կառուցվում է «Արմավիր» քրեակատարողական հիմնարկը՝ Եվրոպական չափանիշներին համապատասխան: Եկող տարեվերջին այն պատրաստ կլինի եւ կնպաստի գերծանրաբեռնվածության թեթեւացմանը»:
Կարդացեք նաև
Մարգարիտ Եսայանը նաեւ հավելեց, որ ցմահ ազատազրկվածների խցերում տեղադրված էին հեռուստացույցներ, DVD-ներ, էլեկտրական թեյնիկներ եւ ապրելու համար անհրաժեշտ այլ պարագաներ: «Պարզապես, կային չափազանց մաքուր եւ չափազանց փնթի խցեր: Ճիշտ այնպես, ինչպես ազատության մեջ՝ փնթիներն ապրում էին փնթի խցերում, մաքուրները՝ մաքուր»:
Նելլի ԳՐԻԳՈՐՅԱՆ
