«Սիվիլիթաս» հիմնադրամի եւ Վարդան Օսկանյանի նկատմամբ ճնշումները դադարեցնելու պահանջով այսօր «Սիվիլիթաս» հիմնադրամի աշխատակիցները բողոքի ակցիա են անցկացրել գլխավոր դատախազության առջեւ եւ գլխավոր դատախազին փոխանցել ճնշումները դադարեցնելու քաղաքացիների ստորագրությունները:
«Արդարություն ու արդարադատություն ենք պահանջում մեր հայրենիքում: «Սիվիլիթաս» հիմնադրամի եւ նրա հիմնադիր Վարդան Օսկանյանի նկատմամբ հետապնդումները վկայում են Հայաստանում ժողովրդավարության տկարության եւ դրա ավելի թուլացման մասին: Այս գործը առաջին նախադեպը չէ, այն մեր երկրում ամենաթողության հերթական դրսեւորումն է: Սա մեկ քաղաքական գործչի, մեր կազմակերպության հարցը չէ, սա երկրում իրավական, քաղաքական ու բոլոր ոլորտների անառողջության դրսեւորումն է»,- ասաց հիմնադրամի աշխատակից Սեդա Գրիգորյանը:
«Օրակարգ» օրաթերթի լրագրող Թաթուլ Հակոբյանն էլ հավելեց, որ նախագահ Սերժ Սարգսյանը եւ նրան խորհուրդ տվող թիմը մեծ ցանկություն ունի, որ ժամ առաջ փակվի ե՛ւ «Սիվիլիթասը», ե՛ւ դրա հովանու ներքո գործող լրատվամիջոցները. «Այսպիսի ծրագրերը կարող են դառնալ սկիզբը ավելի մեծ գործընթացի, եւ իշխանությունները փորձելու են բնում խեղդել կոշտ մեթոդներով: Կփորձենք թույլ չտալ»:
Կարդացեք նաև
Մանրամասները՝ տեսանյութում:
Արփինե ՍԻՄՈՆՅԱՆ
