Այսօր Վարդան Ղուկասյանի` Գյումրու քաղաքապետարանին թողած ահռելի պարտքերի ցանկը հրապարակելիս, նորընտիր քաղաքապետ Սամվել Բալասանյանը ուշագրավ մի հայտարարությամբ հանդես եկավ. «Ճիշտն ասած վարորդական ծառայությունների հետ կապված պարտքեր կան, որոնք ես սառեցրել եմ, ինձ ախրաննիկ պետք չէ, ես ինքնուրույն կարող եմ լինել ինձ համար ախրաննիկ, այսինքն ես կարող եմ լինել իմ ախրաննիկը, էդ ավելորդ ծախսը ես հանելու եմ ընդհանրապես»:
Սամվել Բալասանյանը այնպիսի տպավորություն ստեղծեց, թե իբրև այս մասին խոսում է ի միջայլոց, սակայն իրականում նրա խոսքը ուղղված էր լրատվամիջոցներին, ովքեր վերջին շրջանում լուսաբանում էին պարոն Բալասանյանի թիկնապահների «քաջագործությունները»: Հիշեցնենք, որ նրա երևանյան թիկնապահները ծեծել էին գյումրեցի իրենց կոլեգային` վերջնահաշիվ պահանջելու համար: Ի տարբերություն Սամվել Բալասանյանի` Վարդան Ղուկասյանը իր «ախրաննիկների» ծախսը գանձում էր ՀՀ ոստիկանությունից, պետությունը բավականին մեծ գումարներ էր փոխանցում այս նպատակի համար, և սա ամենևին էլ ինքնանպատակ չէր, կապված էր նրա դեմ մահափորձ կատարելու փաստի հետ:
Նունե ԱՐԵՎՇԱՏՅԱՆ
