Կառավարական ստորաբաժանումները հրետանային հարված են հասցրել ապստամբների հենակետ Դումա քաղաքի տարածքների ուղղությամբ
Ընդդիմության ակտիվիստների համաձայն, Սիրիայի կառավարական օդուժի ռազմական օդանավերն ուրբաթ օրը ռմբակոծել են մայրաքաղաք Դամասկոսի մոտակայքում գտնվող թիրախները:
Մեծ Բրիտանիայից իր գործունեությունն իրականացնող «Սիրիայում մարդու իրավունքների դիտակետ» կազմակերպությունը հայտնել է նաև, որ կառավարական ստորաբաժանումները հրետանային հարված են հասցրել ապստամբների հենակետ Դումա քաղաքի տարածքների ուղղությամբ:
Սիրիայի պետական «ՍԱՆԱ» լրատվական գործակալությունն իր հերթին հայտնել է, թե Դամասկոսում նախօրեին ինքը զոհի պատճառը դարձած պայթյունն իրականացվել է «ահաբեկիչների» կողմից տեղադրված պայթուցիկ նյութերը գործարկելու միջոցով:
Կարդացեք նաև
Այս պայթյունի համար դեռևս որևէ մեկը պատասխանատվություն չի ստանձնել:
Միավորված ազգերի կազմակերպության հանձնարարությամբ իրականացված ուսումնասիրության վերջերս հրապարակված արդյունքները վկայում են այն մասին, որ Սիրիայում չդադարող հակամարտության զոհ է գնացել առնվազն 60 հազար մարդ:
Վերլուծաբանների ու հետազոտողների կողմից հինգ ամսվա ընթացքում տեղեկատվության յոթ աղբյուրների, ներառյալ Սիրիայի կառավարության կողմից տրամադրվող տեղեկությունների ուսումնասիրության արդյունքում կազմվել է 2011 թվականի մարտի 15-ից մինչև 2012 թվականի նոյեմբերի 30-ն ընկած ժամանակահատվածում զոհված 59648 անձանց անունները պարունակող ցուցակ:
«Հաշվի առնելով այն հանգամանքը, որ նոյեմբերի վերջից հակամարտությունը չի դադարել, կարող ենք եզրակացնել, որ 2013 թվականի սկզբի դրությամբ զոհվել է ավելի քան 60 հազար մարդ», – շաբաթվա սկզբին ասել էր Միավորված ազգերի կազմակերպության մարդու իրավունքների հարցերով գերագույն հանձնակատար Նավի Փիլեյը՝ հավելելով. «Զոհերի թիվը զգալիորեն գերազանցում է կանխատեսումները, և դա իսկապես ցնցող հանգամանք է»:
Որոշ կարծիքների համաձայն, Սիրիայում զոհվածների վերաբերյալ ՄԱԿ-ի կողմից ներկայացված գնահատականը սակայն ցածր է, քանի որ հետազոտությունում հաշվի չեն առնվել անհայտ կորած անձանց մասին տվյալները:
Արմեն Հովհաննիսյան
«Ամերիկայի Ձայն»
