Այսօր «Արմատ» ակումբում վրացագետ Ալիկ Էրոյանցն անդրադարձավ Բիձինա Իվանիշվիլու Հայաստան այցի, Փաշազադեի Արցախ այցելության հետ կապված նրա հայտարարության, ինչպես նաեւ Ադրբեջանում բնիկ ժողովուրդների ցույցերին:
Էրոյանցի խոսքով՝ Բիձինա Իվանիշվիլիի` Հայաստան սպասվելիք այցը ճանաչողական բնույթ կկրի. «Ներկայիս իշխանությունները փորձում են հարաբերություններն ավելի բարելավել Հայաստանի հետ, ինչը վնասում է վրաց-ադրբեջանական հարաբերությունները: Բայց քանի որ Իվանիշվիլին փորձառու քաղաքական գործիչ չէ, ապա իր համար հեշտ է անել որեւէ հայտարարություն, ու կրկին հետ կանգնել դրանից»:
Էրոյանցն անդրադառնալով նաեւ Վահագն Չախալյանի ազատ չարձակմանը՝ ասաց, որ երկու օր առաջ Վրաստանում խորհրդարանի խոսնակի կողմից ստորագրվել էր համաներման մասին օրենքը, որի համաձայն՝ երեք հազար բանտարկյալ ազատ է արձակվելու. «Խորհրդարանը ձայների մեծամասնությամբ կարողացավ հաղթահարել նախագահի դրած վետոն: Իսկ այն հոդվածները, ըստ որի՝ Չախալյանը մեղավոր էր ճանաչվել, մտնում էին համաներման չափանիշների մեջ, սակայն Չախալյանի անունն այդ ցուցակներից դուրս մնաց: Այստեղ քաղաքական ենթատեքստ կա»:
Եվա ՀԱԿՈԲՅԱՆ
