«Այս տարի նույնպես Ադրբեջանի կողմից լարվածությունը չի թուլանա, քանի որ Ադրբեջանի իշխանություններն ունեն ներքին եւ արտաքին լեգիտիմության լուրջ խնդիր, հետեւաբար` փորձելու են ներքին խնդիրները լուծել «պատերազմական հռետորաբանությամբ»: Կարծում եմ` այս տարի նույնպես ականատես կլինենք Ադրբեջանի կողմից ազգային փոքրամասնությունների հանդեպ բռնությունների»,-Aravot.am-ի հետ զրույցում կարծիք հայտնեց պատմաբան, ԵՊՀ դասախոս Գեւորգ Մելքոնյանը:
Նրա խոսքով. «Ղարաբաղի հարցում 2 կողմն էլ պատրաստակամ է շարունակել բանակցային գործընթացը, սակայն ցանկալի փոփոխություններ ակնկալել պետք չէ, քանի որ Ադրբեջանը պատրաստ չէ կառուցողական դիրքորոշում ցուցաբերել: Ադրբեջանի ոչ կառուցողական քաղաքականությունը յուրաքանչյուր անգամ «վիժեցնում» է խաղաղ բանակցային գործընթացը»:
Ինչ վերաբերում է ԵԱՀԿ Մինսկի խմբին, պատմաբանը փաստեց, որ այն իրականացնում է ընդամենը միջնորդական առաքելություն եւ խաղաղ բանակցություններ վարելու քաղաքականություն. «Երբեմն կարծում ենք, թե Մինսկի խումբը պետք է լուծի մեր խնդիրները, ինչը սխալ է: Մյուս կողմից, այս տարի ամեն ինչ պետք է անել, որպեսզի խաղաղ բանակցություններն ընթանան Մինսկի խմբի շրջանակում, ոչ թե այլ կառույցների, ինչպես ցանկանում է Ադրբեջանը»:
Մեր զրուցակցի դիտարկմամբ` Ղարաբաղի կոնֆլիկտը չի փակվի Հայաստանի կողմից ԼՂՀ անկախության ճանաչմամբ. «Օրինակ, Ռուսաստանը ճանաչեց Աբխազիան եւ Օսեթիան, սակայն խնդիրը դեռեւս չի փակվել: Մեր պարագայում պետք է գանք այնպիսի համաձայնության, որ 2 կողմի համար էլ այն լինի ընդունելի: Գուցե 2 կողմն էլ ցավալի զիջումներ անի, բայց պետք է գործել ի նպաստ տարածաշրջանում խաղաղության հաստատման»:
Կարդացեք նաև
Լուիզա ՍՈՒՔԻԱՍՅԱՆ
