«Այսօր կարեւոր է, որ երկու կողմերը նստեն ու երկխոսեն երկրի անելիքների մասին»,-այսօր «Հայելի» ակումբում նման կարծիք հայտնեց ՀՀԿ պատգամավոր Մարգարիտ Եսայանը՝ խոսելով հետընտրական իրավիճակի մասին: Իսկ ասուլիսի մեկ այլ մասնակցի՝ նախկին «ժառանգական» Վարդան Խաչատրյանի խոսքերով էլ՝ այս ընտրություններում նույնպես կիրառվել են բոլոր տեսակի ընտրակեղծիքները. «Այս անգամ էլ ընտրակեղծիքների ամբողջ հանրագիտարանը կիրառվել է: Օրենքի մեջ բացթողումներ կան, որոնք սողանքի ու կեղծիքների տեղ են թողնում»:
Մարգարիտ Եսայանի խոսքերով էլ՝ 1988 տեղամասերում քաղաքական ուժերի ներկայացուցիչները ստորագրել են արդյունքները. «Ընդդիմությունը չունի կեղծիքների մասին այն փաստերը, որի մասին խոսում է: Րաֆֆի Հովհաննիսյանը պատրաստվում է դիմել Սահմանադրական դատարան, անհասկանալի է, թե ինչ փաստերով է դիմելու:Ինձ համար անհանգստությունը Ազատության հրապարակում հավաքված մարդիկ են»:
Տիկին Եսայանի անձնական կարծիքով՝ պետք է համաձայնության կառավարություն ստեղծվի, եւ «եթե «Ժառանգությունն» ունի համապատասխան կադրեր, ապա թող բերեն միասին աշխատենք»:
Համաձայնության կառավարության տարբերակն, ըստ Վարդան Խաչատրյանի, վատ տարբերակ է, եթե նման համաձանության գան Րաֆֆի Հովհաննիսյանն ու Սերժ Սարգսյանը, ապա, կառավարություն մտնելով, ընդդիմությունն ուղղակի կախվածության մեջ է ընկնելու իշխանությունից, այս տարբերակից խուսափում են բոլոր քաղաքական ուժերը: Պարոն Խաչատրյանի ներկայացմամբ՝ երկխոսության լավագույն տարբերակը խորհրդարանական նոր ընտրություններ նշանակելն է:
Կարդացեք նաև
Նելլի ԲԱԲԱՅԱՆ
