Նա գտնում է, որ հացադուլի պատճառով իշխանությունները դժվար թե լուրջ զիջումների գնան:
Նախկին ՀԱԿ անդամ, Հայաստանի կանաչների կուսակցության նախագահ Արմենակ Դովլաթյանն այսօր երեկոյան Ազատության հրապարակում էր: Նա եկել էր առաջարկ անելու Րաֆֆի Հովհաննիսյանին: Թե կոնկրետ ինչ քայլեր է առաջարկելու՝ չհրապարակեց՝ վստահեցնելով, որ դա էթիկապես ճիշտ չէ: Նախ պետք է խոսել Րաֆֆի Հովհաննիսյանի հետ, եթե ինքը կընդունի, նոր կհրապարակի, հակառակ դեպքում անիմաստ է ասել. «Նախագահական ընտրություններին ինքն է մասնակցել, ինքն է թեկնածուն եղել եւ փաստացի ինքն է ընտրվել: Ինքը պետք է որոշում կայացնի»:
Ինչ վերաբերում է հացադուլին, Արմենակ Դովլաթյանը գտնում է, որ այն ցանկալի չէ. «Առավել եւս՝ նման իշխանությունների դեպքում, որոնք հաշվի չեն առնում որեւէ բան»:
Նա կարծում է, որ դժվար թե իշխանությունը լուրջ զիջումների գնա. «Նայած ինչ կանեն: Հնարավոր է առաջարկեն մի քանի նախարարական տեղեր, մարզպետների տեղեր կամ այլ պաշտոններ: Նմանատիպ զիջումներ եւ առաջարկություններ կարող է լինեն: Բայց դա խնդրի լուծում չի, բոլորս էլ հասկանում ենք: Այլ բան է, եթե ընդդիմադիր կամ ոչ իշխանական ամբողջ դաշտը, ՀԱԿ-ը, «Ժառանգությունը», ՀՅԴ-ն, ԲՀԿ-ն բոլորը եթե հրաժարվեն մանդատներից, դա կլինի քաղաքական լուրջ ճնշում»:
Կարդացեք նաև
Մեր դիտարկմանը՝ ԲՀԿ-ին է՞լ եք համարում ընդդիմադիր, նա պատասխանեց. «Եթե իրենք գնան այդ քայլին, կդառնան ընդդիմադիր կեցվածքով ուժ եւ ցույց կտան իրենց դիրքորոշումը՝ կոնկրետ հարցի նկատմամբ: Այդ ժամանակ բավականին լուրջ քաղաքական ճգնաժամի առաջ կկանգնեն ներկա իշխանությունները: Դա լուրջ քաղաքական քայլ կլինի»:
Հարցին՝ նախկին կոնգրեսականներն ինչո՞ւ այսօր այստեղ չեն՝ նկատի ունենալով Լեւոն Տեր-Պետրոսյանին, Լեւոն Զուրաբյանին, ՀՀՇ-ի թիմին՝ նա պատասխանեց. «Թիմի համար չեմ կարող ասել, ես կարող եմ ասել մեր կուսակցության անունից: Միշտ էլ մասնակցել եմ ես նման պրոցեսներին, այլ կուսակցության փոխարեն պատասխան չեմ կարող տալ»:
Մեր հարցին՝ ի՞նչն է խանգարում ընդհանուր ընդդիմադիր դաշտին համախմբվել՝ ամբիցիանե՞րն են բարձր, նա պատասխանեց. «Տարբեր մոտեցումներ կան, մարդկային, անձնական խնդիրներ կան: Ամեն մեկն իր համար պետք է լուծի: Ես չեմ կարող Լեւոն Տեր-Պետրոսյանի կամ Լեւոն Զուրաբյանի փոխարեն ասել, թե իրենք ինչու չեն քայլեր կատարում, առավել եւս, որ հիմա իրենց մոտ վերակազմավորում է, անվանափոխության նման պրոցես կա, դա պետք է ձեւավորվի, որից հետո իրենք կակտիվանան ավելի, տեսնենք»:
Հռիփսիմե ՋԵԲԵՋՅԱՆ
Ռաֆֆիի Հովհանիսյանը մեկն է,՝ խորհրդատուները միլիոնից ավել: