«Այս նիստերն ավելի շատ սիրողական մակարդակ ունեն, լուրջ առաջարկներ է պետք անել»,- այսօր այսպես պատասխանեց Սպառողների միության նախագահ Արմեն Պողոսյանը Aravot.am-ի այն հարցին, թե ի՞նչ կարծիք ունի Հեռանկարային զարգացման ռազմավարական ծրագրի, Քաղաքացիական հասարակության ցանցի ոլորտային խմբերի նիստերի որակի և հնչած առաջարկների մասին:
Նա նաև նշեց, որ ծրագիրը 12 տարի ծամկետով է, և, իր կարծիքով, դրան կից պետք է լինի նաև փոքր ծրագիր: «Պետք է լինի ավելի փոքր ծրագիր, կամ հաշվետվության պես մի բան, որը թույլ կտա արմատական փոփոխություններ մտցնել ծրագրում, եթե, ասենք, երկու տարի հետո ծրագիրը բացասական արդյունքներ տա»:
Պարոն Պողոսյանի կարծիքով՝ պետք է նաև ուշադրություն դարձնել այն հանգամանքին, որ մեր հողերի մեծ մասը անմշակ են և կամաց- կամաց դատարկվում են: Նա նաև անդրադարձավ քննարկման ընթացքում անվճար ոռոգման ջրի հարցին. «Իսկ ինչ վերաբերում է ձրի ոռոգման ջրերին, ասեմ՝ այս կյանքում ձրի ոչինչ չի լինում»:
Մարինե ՂԱԶԱՐՅԱՆ
