Այսօր Կոմիտասի անվան Կամերային երաժշտության տանը տեղի ունեցավ «Գրի՛ր» գրական մրցույթի երկրորդ մրցանակաբաշխությունը:
Մրցույթի կազմակերպիչներից Իրինա Հախունցը Aravot.am-ի հետ զրույցում նշեց, որ ամենամսյա «Գրիր» գրական մրցույթին մասնակցում են բոլոր ցանկացողները` առանց տարիքային եւ սեռային սահմանափակման. «Յուրաքանչյուր ամիս ընտրվում է մեկ ժանր, իսկ մասնակիցների աշխատանքները գնահատում է ժյուրին: Այս անգամ պարգեւատրվելու են 4-րդ, 5-րդ, եւ 6-րդ մրցույթների հաղթողները: 4-րդ մրցույթի ժանրը քննադատական հոդվածն էր, որի միջոցով փորձ է կատարվել վեր հանել հասարակությանը հուզող խնդիրները, 5-րդ մրցույթի ժանրը հեքիաթն էր, իսկ 6-րդինը` չափածոն»: Իրինա Հախունցը բարձր է գնահատում մասնակիցների ակտիվությունը. «Առաջին մրցույթում երեսուն մասնակից կար»: Իրինան նաեւ տեղեկացրեց, որ հաղթողներին որոշում է պրոֆեսիոնալ ժյուրին` «ծանոթ-բարեկամի» մոտեցումը բացառելու համար. «Բացի այդ, ժյուրիի անդամների անունները չեն հրապարակվել»:
«Հեքիաթ» ժանրում երրորդ մրցանակակիր Հերիքնազ Հակոբյանը մեզ հետ զրույցում ասաց, որ իր ներկայացրած «Լինում է, չի լինում» հեքիաթը «մեծերի համար» է. «Հերոսներն ավելի հասուն` մանկականին ոչ բնորոշ ապրումներ ունեն: Հեքիաթը սիրո մասին է, իսկ «հերոսները» քամին են եւ լուսինը: Քամին սիրում է լուսնին, բայց թեւերը այդպես էլ չեն հասնում լուսնին»:
Գրողի խոսքով. «Մեծերին ավելի շատ են պետք հեքիաթները»: Տիկին Հակոբյանը տեղեկացրեց, որ գրել է մանկուց, սակայն գրական ասպարեզում նոր է սկսկել լուրջ քայլերը. «Այդ առումով մրցույթը ներկայանալու հնարավորություն է տալիս»:
Կարդացեք նաև
Լուիզա ՍՈՒՔԻԱՍՅԱՆ
