Կապանի տարածաշրջանի Նորաշենիկ գյուղական համայնքի բնակիչները գյուղի հիմնական խնդիրներից ու գյուղացիների առօրյա հոգսերից զատ, պակաս կարեւոր չեն համարում տրանսպորտի խնդիրը:
Նորաշենիկցիներն օգտվում են Կապան-Անտառաշատ գյուղը սպասարկող տրանսպորտային միջոցից, որն աշխատում է օրը 2 անգամ: Յուրաքանչյուր ուղեւոր տրանսպորտից օգտվելիս վճարում է 300 դրամ, բնակիչները գտնում են, որ տոմսի արժեքը գյուղացու գրպանի համար շատ բարձր է: «Ես քաղաքում եմ աշխատում, ամեն աշխատանքային օր քաղաք գնալու եւ գյուղ վերադառնալու համար պետք է օրական 600 դրամ գումար վճարեմ: Նույնիսկ 6 տարեկան երեխան պայուսակը ձեռքին նստում է տրանսպորտ՝ գումար է վճարում: Բացի այդ, այդպես էլ անհասկանալի է մնում, թե ինչո՞ւ նորաշենիկցին պետք է վճարի նույն գինը, ինչ վճարում է ավելի հեռու գտնվող Անտառաշատ գյուղի բնակիչը: Կապանից Քաջարան ավելի հեռու է, քան Նորաշենիկը, բայց այդ գծից օգտվելիս բնակիչները նույնպես 250-300 դրամ են վճարում», -ասաց Նորաշենիկի բնակչուհի տիկին Աննան:
Նույն գյուղի բնակչուհի Իսկուհին էլ տեղեկացրեց, որ ուսանողուհի աղջիկ ունի, ով Կապանի բժշկական քոլեջում է սովորում, նաեւ տրանսպորտի ծախսերից ելնելով ստիպված քաղաքում բարեկամի տանն է հաստատվել, որտեղից էլ քոլեջ է հաճախում: Նորաշենիկցիներից շատերն էլ քաղաք մեկնում են պատահական մեքենաներով: Նշենք, որ Նորաշենիկը Կապանից 18 կմ հեռավորության վրա է գտնվում, իսկ Անտառաշատ գյուղը` 24 կմ:
Կապան-Անտառաշատ երթուղին սպասարկող միկրոավտոբուսի վարորդ Վաչե Փարամազյանն էլ պարզաբանեց, որ իրականում գիծն աշխատացնելը ձեռնտու չէ, ուղեւորները շատ քիչ են, ստացած գումարն էլ հազիվ հերիքում է մեքենայի ծախսերը հոգալու համար: «Եղած գումարը հազիվ վառելիքի, անվադողերի, մեքենայի յուղի եւ հարկայինի վճարների ծախսերին է բավականացնում, օր է պատահում նույնիսկ գրպանիցս եմ վառելիքի գումար վճարում, ստիպված եմ աշխատում` մի կտոր հացի փող ունենալու համար: 300 դրամը միջին գին ենք դրել, որպեսզի մարդիկ կարողանան օգտվեն: Որ ինձանով լինի՝ չեմ էլ աշխատի, ուղղակի գյուղացիների խաթր եմ գնում: Ժամանակ է լինում, նույնիսկ դատարկ եմ գյուղ գնում, մարդ չի լինում, որ ճանապարհին գոնե մեկի հետ զրուցեմ: Օրական հազիվ 4000-5000 դրամ գումար է հավաքվում, դա էլ լավագույն դեպքում: Գծից մոտ 5-6 գյուղի բնակիչներ են օգտվում, բայց քիչ թվով, Նորաշենիկից համարյա մարդ չի էլ օգտվում, շաբաթվա մեջ մեկ կամ երկու հոգի հազիվ», – հավելեց Վաչե Փարամազյանը:
Կարդացեք նաև
Մերի ՍՈՂՈՄՈՆՅԱՆ
