Նախագահական նստավայրից այսօր մեկնարկած ՀՀ նախագահ Սերժ Սարգսյանի կեղծ երդման թաղման արարողությունը ավարտվեց Ազատության հրապարակում:
«Մեր երկրի սիրելի քաղաքացիներ, ձեր մասնակցությամբ հայտարարում ենք, որ կատարում ենք Հայաստանի 20-ամյա պատմության կուտակված կեղծիքների, կեղծ երդումների, կեղծ օրենքների, կեղծ ընտրությունների արդյունքների եւ դրա բոլոր հետեւանքների հուղարկավորությունը: Միակ անգամն է, որ հուղարկավորության եկել ենք ուրախությամբ, որովհետեւ հայտարարում ենք, որ ազատագրվում ենք ամեն տեսակ կեղծիքից»,- թաղման արարողությանն ասաց «Ժառանգության» անդամ Անահիտ Բախշյանը:
ԱԺ «Ժառանգություն» խմբակցության պատգամավոր Զարուհի Փոստանջյանն էլ շարունակեց, որ արդեն ձեռք են բերել մահացած կեղծիքների մահվան վկայականը. «Ապրիլի 9-ին դիմել ենք համապատասխան մարմիններին, ստացել ենք Սերժ Սարգսյանի երդման, հայտարության մահվան վկայականը: Բայց մեր քաղաքային իշխանությունները մեզ այդպես էլ գերեզմանոցում հող չհատկացրին, ասացին՝ ստերի, կեղծիքների համար հայրենի հողից ոչ մի թիզ հատկացում չենք կարող անել: Հարցրինք՝ ի՞նչ խորհուրդ կտաք, որտեղ թաղենք այս կեղծիքը, 20 տարվա բեռ է, նաեւ վարակիչ է, ասացին՝ գցեք աղբարկղը»:
Կարդացեք նաև
Ակտիվիստներն այդպես էլ արեցին՝ կեղծ երդումը խորհրդանշական դագաղով գցեցին աղբարկղը եւ վրան «հողը թեթեւացնելու» խորհրդանիշով անձեռոցիկներ գցեցին:
Հուղարկավորության ավարտին նրանք ընթերցեցին «Նոր Հայաստանի» երդմնակալության տեքստը եւ երգեցին ՀՀ ազգային օրհներգը:
Արփինե ՍԻՄՈՆՅԱՆ
