Հայաստանի պետական ճարտարագիտական համալսարանի (Պոլիտեխնիկ) և Ն. Բաումանի անվան Մոսկվայի պետական տեխնիկական համալսարանի սերտ համագործակցության շրջանակներում ճարտարագիտական համալսարանում տեղի կունենա «Կրթական ռեսուրսներ ԱՊՀ երկրների ճարտարագետների համար» հեռավար հասանելիության կենտրոնի պաշտոնական բացման արարողությունը:
Կենտրոնը թույլ կտա ավելի քան 60 ուսումնական ծրագրերով հեռավար ուսուցման տարբերակով տեխնիկայի և տեխնոլոգիաների նոր ուղղություններով որակավորման բարձրացման դասընթացներ իրականացնել հայ ճարտարագետների համար:
Հանդիսավոր բացմանը կմասնակցեն ՀՀ Կրթության և գիտության նախարար Արմեն Աշոտյանը, ՀՀ-ում «Россотрудничество» Դաշնային գործակալության ղեկավարի տեղակալ Մարկ Կալինինը, Ն.Բաումանի անվան Մոսկվայի տեխնիկական համալսարանի Հանրային խորհրդի գործադիր քարտուղար Իգոր Գայմանովը, գործարարներ, բուհերի ներկայացուցիչներ և դասախոսներ:
«Կրթական ռեսուրսներ ԱՊՀ երկրների ճարտարագետների համար» հեռավար հասանելիության կենտրոնի ստեղծումը նախագիծ է, որն իրականացվում է Ն.Բաումանի անվան Մոսկվայի պետական տեխնիկական համալսարանի, ԱՊՀ պետությունների հումանիտար համագործակցության հիմնադրամի, ինչպես նաև նախագծային աշխատանքներին մասնակցող ԱՀՊ երկրների բուհերի կողմից:
Կարդացեք նաև
Նախագծի նպատակը ԱՊՀ երկրների մասնագետների համար որակավորման բարձրացման ու վերապատրաստման ճյուղավորված համակարգի ստեղծումն է:
Առաջիկայում նշված նախագծի շրջանակներում կկազմակերպվի «Գլոբալ նավիգացիոն արբանյակային համակարգեր» դասընթացը, որը կիրականացվի Ն. Բաումանի անվան տեխնիկական համալսարանի ուսումնամեթոդական համալիրների, ուսումնական ձեռնարկների, ծրագրային միջոցների գործածությամբ:
ՀՊՃՀ (Պոլիտեխնիկ), Հասարակայնության հետ
կապերի և տեղեկատվության բաժին
