Երեւանի Ավան եւ Նոր-Նորք համայնքների ընդհանուր իրավասության դատարանում է քաղաքացի, 53-ամյա Լենդրուշ Գեղամյանի դեմ հարուցված քրեական գործը:
Դատական տեղեկատվական համակարգից տեղեկացանք, որ Լենդրուշ Գեղամյանին մեղադրանք է առաջադրվել այն բանի համար, որ նա չմասնակցելով ՀՀ եւ ԼՂՀ սահմանների պաշտպանությանը, որպես հաշմանդամ ազատամարտիկ կենսաթոշակ ստանալու եւ այլ իրավունքներից օգտվելու նպատակով խաբեությամբ ձեռք է բերել ՀԱԲ -ի «Ադանա» կամավորական ջոկատի կազմում 1989-1993թթ. ընթացքում ՀՀ եւ ԼՂՀ սահմանների պաշտպանությանը մասնակցելու եւ «կոնտուզիա» ստանալու վերաբերյալ կեղծ փաստաթղթեր, որոնք ներկայացրել է տարբեր բժշկական հաստատություններ, հետազոտվել որպես ազատամարտիկ եւ 15.04.2004 թվականին ճանաչվելով 2-րդ խմբի հաշմանդամ մինչեւ 01.11.2011թ.խաբեության եղանակով հափշտակել է առանձնապես խոշոր չափի 20 միլիոն ՀՀ դրամ:
Գործով հինգ նիստ արդեն կայացել է: Դատավճիռ դեռ չկա: Գեղամյանը ստորագրությամբ ազատ է արձակվել:
