Այսօր Մաշտոցի պուրակում առաջին անգամ անցկացվեց Vegan Fest Yerevan փառատոնը: Բուսակերությանը նվիրված այս միջազգային փառատոնի կարգախոսն է «Ընտրիր կյանքը»։ Փառատոնի նպատակն էր Հայաստանում տարածել առողջ ապրելակերպի գաղափարը, ինչպես նաեւ եւս մեկ անգամ հիշեցնել կենդանիների շահագործման խնդրի, նրանց՝ բռնությունից եւ տառապանքից ազատ ապրելու իրավունքի մասին: Փառատոնին ներկա էր նաեւ «Դինգո» կենդանասերների թիմը, որը իր հետ բերել էր որդեգրման ենթակա կենդանիներ:
Փառատոնի կազմակերպիչ անդամ Արեւիկ Պետրոսյանի փոխանցմամբ` որդեգրման ենթակա շներից երեքը գտան իրենց տերերին:
Փառատոնը հագեցած էր մշակութային, սպորտային եւ ժամանցային տարաբնույթ միջոցառումներով, բուսական համեղ սննդի հյուրասիրությամբ: Օրվա ընթացքում առողջ սննդի վերաբերյալ դասախոսությամբ հանդես եկան սննդագետ, բժիշկ Հայկազ Սարգսյանը եւ Նարինե Բաղդասարյանը:
Կարդացեք նաև
Փառատոնին ներկա էր նաեւ իրանցի Մեհդի Ղոլամին, ով Հնդկաստանում զարգացրել է յոգայի իր հմտություններն ու այժմ հայ երիտասարդներին ուսուցանում է Art Yoga, սակայն այսօր փառատոնի ընթացքում ապահովում էր երաժշտական մասը:
Քրիստինա ՄԻՐԶՈՅԱՆ
