ՀԿԿ Վանաձորի քաղաքային կոմիտեի առաջին քարտուղար Անդրանիկ Ղուկասյանը կարծում է, որ այսօր ուղղակի ստիպված ենք Հայաստան անունը ջնջել, մի տասը օլիգարխի անունների առաջին տառերը դնել ու ասել` մեր պետությունը դա է:
«Այսօրվա դրությամբ, եթե նախագահական ընտրություն լիներ ու ընտրություններում Սերժ Սարգսյանն իր թեկնածությունը դներ գեթ մեկ օլիգարխի հետ, ապա վերջինս 95/5 հարաբերությամբ հաղթելու էր»:
Այդ մասին Aravot.am-ի հետ զրույցում իր կարծիքն է հայտնում ՀԿԿ Վանաձորի քաղաքային կոմիտեի առաջին քարտուղար Անդրանիկ Ղուկասյանը` բացատրելով, որ դա Հայաստանում տիրող օլիգարխիայի զարգացման հետեւանք է:
«Պատճառն այն է, որ օլիգարխը պետությունից քամում է ամեն ինչ, ժողովրդին մի բան է տալիս, հայտարարում, հեռուստացույցով ցույց տալիս` թե ավտոբուսը աշխատեց, այս արեցին, այն արեցին, եւ այս ամենը պետության հովանու ներքո: Բայց պետությունը թող ինքը հսկող լինի, պետությունը ինքը այդ ավտոբուսով տեղափոխի, որ ասեն` ապրի պետությունը, ապրի հիմիկվա նախագահը: Իսկ այսօր բարձիթողի վիճակ է»,-ասում է Անդրանիկ Ղուկասյանը:
Կարդացեք նաև
Նա նշում է, որ նման պայմաններում որպես այդպիսին պետությունն էլ գոյություն չունի, այստեղ միայն օլիգարխներն են ապրում:
«Եկեք Հայաստան անունը ջնջենք, մի տասը օլիգարխի անունների առաջին տառերը դնենք, ու ասենք` մեր պետությունը դա է, որովհետեւ իրականում պետությունը դա է, պետություն գոյություն չունի»,-եզրափակում է նա:
Անուշ ԲՈՒԼՂԱԴԱՐՅԱՆ
