«Այսօր Ազատության հրապարակում ազատամարտիկների հերթական հավաքն էր:
Ազատամարտիկ Սուրեն Սարգսյանը դժգոհեց, որ իրենց չարախոսողների ու իրենց փոփոխությունների նախաձեռնությանը թերահավատորեն մոտեցողների պակաս չկա:
«Հարցնում են՝ ինչ պիտի անեք, ով մոռացել է՝ ինչ ենք արել, թող հարցնեն իրենց քիրվա ադրբեջանցիքին: Իսկ թե այսօր ինչ կարող ենք անել, էլի խորհուրդ կտամ հարցնեն քիրվա ադրբեջանցիքին»,- ասաց պարոն Սարգսյանը:
Հետո իրենց քննադատողներին անդրադարձավ. «Ասում են՝ էս տղերքն ինչ են ջուր ծեծում, եկեք գնանք դրանց գլուխները ջարդենք: Բայց մենք ղասաբի բնավորություն ունենք, ապրանքը հասունացնում ենք, հետո՝ մորթում: Ամեն ինչ իր ժամանակին»:
Կարդացեք նաև
Նա նաեւ ասաց, որ կուսակցությունների ղեկավարների կլոր-սեղան քննարկումը հոկտեմբերի 18-ին է լինելու. «Նախ ճշտելու ենք՝ ինչ ենք ուզում, ինչպես ենք ուզում: Ազգովի որոշելու ենք ինչ անել»:
Գորիսի նախկին քաղաքապետ Սամվել Հարությունյանն էլ ասաց՝ ոչ մի կասկած չունի, որ շատ կարճ ժամանակում Հայաստանի ծանրագույն ներկայով եւ բաղձալի ապագայով մտահոգ բոլոր քաղաքացիները իրենց վճռական ներկայությամբ եւ հավաքական մարտնչող անհանդուրժողականությամբ այս հրապարակը վերջապես դարձնելու են հայոց ազգային բարոյականության օազիս:
Հետո կոչ արեց երիտասարդությանը, հատկապես ուսանողներին համախմբվել. «Այն օրը, երբ Երեւանի ուսանողությունը եղեգի նման դուրս կհորդի համալսարանական գորշ միջավայրից եւ կբոլորվի այս հրապարակում, քաջություն կունենա այստեղ ընտրելու հայոց ուսանողական խորհուրդ, ուղղորդելու եւ ղեկավարելու ուսանողական շարժումը, հաջորդ օրն իսկ վերջապես բացվելու է այդքան բաղձալի հայոց արշալույսը: Մեզ սպասվում է ազատագրական պայքար: Եւ այդ պայքարը հաղթանակի կհասնի միայն այն դեպքում, երբ շարժիչ ուժը դառնա հայ ուսանողությունը»:
Նա կրկին անդրադարձավ Սյունիքի նախկին մարզպետ Սուրիկ Խաչատրյանի առանձնատան դիմաց տեղի ունեցած կրակոցներին եւ դեպքի առթիվ ասաց, որ նորանշանակ գլխավոր դատախազ Գեւորգ Կոստանյանին ուղղորդեցին, որ ինքն էլ ուղղորդի այդ գործը: Նա դժգոհեց, որ Հայաստանը իրավական պետություն չէ, Հայաստանում անիրավ համակարգ է իշխում. «Մեր հայրենիքը շարունակում են դիտել որպես իրենց բանդաների վայրի կամայականությունների փորձադաշտ: Այլեւս հանդուրժողականությունը, անտարբերությունը, լռությունը հանցագործություն է: Այլեւս այդ երեւույթները հայրենիքի դավաճանություն պիտի դիտենք եւ բոլորվենք, համախմբվենք այս հրապարակում»:
Նա Ազատամարտիկների շարժումը ազգային ազատագրական շարժում որակեց ու հռչակեց կարգախոսի իր տարբերակը. «Հայրենիքը վտանգի մեջ է, մայր Հայաստանն է կանչում, բռունցքվելն է փրկությունը Հայաստանի»:
Նա առաջարկեց նաեւ ստեղծել հայրենիքի փրկության կոմիտե, որին կանդամակցեն անխոցելի բարոյական նկարագիր ունեցող գործիչներ. «Հիմնականում անկուսակցական, նաեւ կուսակցական մարդիկ, որոնք նախկինի պես չխաբեն ժողովրդին»:
Հայ ժողովրդին կեղեքող ռեժիմի անունն էլ առաջարկեց դնել «Լիսկայություն»:
Արփինե ՍԻՄՈՆՅԱՆ
Ավելի լավ կհնչի՝ կոչել Լիսկազավրներ:
Իսկ հիվանդությունը՝ Լիսկամանիա