Նոյեմբերի 6-ը, 2013թ., Երևան։ Քաղաքացիական հասարակության ինստիտուտը 2013 թվականի նոյեմբերի 4 և 5–ին իրականացրեց երկօրյա դասընթաց` «Մարդու իրավունքները քրեական դատավարության համատեքստում» թեմայով: Դասընթացին մասնակցեցին քաղաքացիական ակտիվիստներ, մարդու իրավունքների պաշտպանությամբ հետաքրքրված անձինք, հասարակական կազմակերպությունների ներկայացուցիչներ, ընդհանուր առմամբ՝ 20 հոգի։
ՔՀԻ նախագահ Արման Դանիելյանի համաձայն, մարդու իրավունքների պաշտպանությամբ զբաղվող ակտիվիստների համար նմանատիպ սեմինարները շատ կարևոր են: «Իրավական գիտելիքները զգալիորեն կօգնեն նվազեցնել ապօրինի ազատազրկվելու և խոշտանգումների ենթարկվելու ռիսկերը, եթե ինչ–որ պատճառներով նրանց բերման են ենթարկվել», նշեց Արման Դանիելյանը։
Քաղաքացիական հասարակության ինստիտուտի իրավաբաններ Տաթևիկ Ղարիբյանը և Աննա Մելիքյանը ներկայացրեցին մարդու իրավունքների հասկացությունն առհասարակ, մարդու իրավունքների պաշտպանությունը երաշխավորող տեղական և միջազգային օրենսդրությունը, իրավունքների պաշտպանության մեխանիզմները՝ մասնավորապես անդրադառնալով խաղաղ հավաքների, ազատության և անձնական անձեռնմխելիության իրավունքներին, ինչպես նաև ձերբակալվածների և կալանավորվածների իրավունքներին։
Քաղաքացիական հասարակության ինստիտուտի նախագահ Արման Դանիելյանը ներկայացրեց խոշտանգումներից և դաժան վերաբերմունքից զերծ մնալու իրավունքը, ինչպես նաև ՄԱԿ-ի և Եվրոպայի խորհրդի մոտեցումները խոշտանգումների կանխարգելմանը՝ նշելով Մարդու իրավունքների եվրոպական դատարանի նախադեպային որոշումները։
Ձեռքբերած գիտելիքները կիրառելու և ամրապնդելու նպատակով դասախոսություններին զուգահեռ կազմակերպվեցին ինտերակտիվ խմբային աշխատանքներ և խաղեր, ինչպես նաև քննարկումներ մասնակիցներին հուզող հարցերի շուրջը: Դասընթացի մասնակիցները հնարավորություն ունեցան բարձրաձայնելու իրենց հուզող հարցերի մասին, քննարկելու և արտահայտելու իրենց կարծիքը։
«Մարդու իրավունքները քրեական դատավարության համատեքստում» դասընթացը կազմակերպվել էր «Քաղաքացիական հասարակության ինստիտուտ» ՀԿ-ի կողմից Եվրոպական միության (90%) և Նորվեգիայի հելսինկյան կոմիտեի (10%) համաֆինանսավորմամբ իրականացվող «Խոշտանգումների և կորզված խոստովանական ցուցմունքի բացառումը որպես արդար դատավարության հիմնաքար» ծրագրի շրջանակներում:
