Կինոյի եւ թատրոնի պետական ինստիտուտի ռեկտոր Արմեն Մազմանյանի բուժումը արտերկրում կազմակերպելու համար կառավարությունն այսօր որոշեց գումար հատկացնել, ինչպես նաեւ՝ գրող Լեւոն Խեչոյանի բուժման համար: Կառավարության այսօրվա նիստին վարչապետ Տիգրան Սարգսյանն ասաց, որ գումար տրամադրելը ՀՀ նախագահ Սերժ Սարգսյանի հանձնարարությունն է: Լեւոն Խեչոյանի բուժումն արտերկրում կազմակերպելու համար պետբյուջեից կհատկացվի 20 հազար եվրոյին համարժեք դրամ, իսկ Արմեն Մազմանյանի համար՝ 10 հազար եվրոյին համարժեք դրամ:
Կառավարությունը նաեւ որոշեց առաջարկել Ազգային ժողովին՝ դեկտեմբերի 20-ին՝ ժամը 12:00-ին գումարել ԱԺ արտահերթ նստաշրջան, որի օրակարգում առաջարկվում է ընդգրկել մի շարք օրինագծեր՝ ՀՀ նախագահ Սերժ Սարգսյանի առարկությունները «Պետական տուրքի մասին» օրենքում փոփոխություններ եւ լրացումներ կատարելու մասին նախագծի շուրջ, եւ գազի վերաբերյալ 3 համաձայնագրերը:
Ի դեպ, ՀՀ վարչապետ Տիգրան Սարգսյանը մի քիչ հիվանդ էր, նրա մոտ թեթեւ հարբուխ էր, դա ակնհայտ էր նրա ձայնից:
Նելլի ԲԱԲԱՅԱՆ
