Վանաձորի մանկատնից 2011 թվականին գողություն կատարելու համար 4 տարվա ազատազրկման դատապարտված, հետախուզման մեջ գտնվող մանկատան նախկին սան Ռոման Կուդաշինը կամովին ներկայացել է ոստիկանություն, եւ այժմ «Վանաձոր» ՔԿՀ-ի կալանավոր է:
Համաձայն մեղադրական եզրակացության` Ռոման Կուդաշինին մեղադրանք էր առաջադրվել այն բանի համար, որ նա 2011թ. հունիս ամսին նախնական համաձայնության գալով Ա. Կիրակոսյանի և Տ. Մելիքջանյանի հետ, դարպասի վրայով ապօրինի մուտք են գործել «Վանաձորի մանկատուն» ՊՈԱԿ-ի տարածք, որտեղից գաղտնի հափշտակել են 150.000 ՀՀ դրամ արժողությամբ «Սոնի» մակնիշի երաժշտական կենտրոնը և ձայնարկիչը՝ իրենց 6 բարձրախոսներով։
Ռոման Կուդաշինը մինչ այժմ էլ չի ընդունում մեղքը:
Նրա փաստաբան Ռուբեն Հակոբյանը Aravot.am-ի հետ զրույցում համոզմունք է հայտնում, որ իր պաշտպանյալը, թեեւ կամովին հանձնվել է, այնուամենայնիվ, չի կատարել վերոնշյալ հանցագործությունը:
Կարդացեք նաև
«Ռոմանի կինը դիմել էր ինձ, որպեսզի երեւան եկած նոր հանգամանքներով վարույթ հարուցվի: Մյուս դատապարտյալը` Արթուր Կիրակոսյանը, ով պնդում է, որ ինքը միայնակ է կատարել հանցագործությունը, դեպքի հաջորդ օրը գնացել է Կուդաշինի տուն եւ փորձել նրան վաճառել հափշտակված երաժշտական կենտրոնը: Հետեւաբար, եթե հափշտակողը փորձում է այդ իրը վաճառել իր ընկերոջը, ապա ընկերը, բնականաբար, հափշտակելիս իր հետ չի եղել»,-ասում է Ռուբեն Հակոբյանը` տեղեկացնելով, սակայն, որ հարուցված վարույթը կարճվել է:
Սպառելով ներպետական բոլոր ատյաններում արդարությունը վերագտնելու հնարավորությունը` փաստաբան Ռուբեն Հակոբյանի խորհրդով՝ Ռոման Կուդաշինը ներկայացել է ոստիկանություն:
«Տվյալ իրավիճակում միակ ելքը համաներման ակտով պատժաչափի կրճատումն է: Մոտ օրերս համաներման ակտը նրա նկատմամբ կկիրառվի, պատժաչափը 1/3-րդով կկրճատվի, կմնա պատիժ կրել 2 տարի 8 ամիս ժամանակ: Դրա կեսը լրանալու ժամանակ էլ Ռոմանը կարող է դիմել պատժի պայմանական վաղաժամկետ ազատման համար»,-եզրափակում է փաստաբանը:
Անուշ ԲՈՒԼՂԱԴԱՐՅԱՆ
