Երեկ Հանրապետության հրապարակում ավտոերթ անցկացրած ակտիվիստները շարունակում են ոստիկանությունից զանգեր ստանալ` իրենց մեքենաների վերաբերյալ տեղեկատվություն պարզելու հարցերով:
Ավտոերթի մասնակից Հայկ Ավետիսյանի պատմելով, ոստիկանները այցելության կամ զանգերի միջոցով տեղեկատվություն են հավաքում` անհասկանալի ու անտրամաբանական պատճառաբանություններով. «Օրինակ` իբր ինչ-որ մի մեքենա այդ օրը վրաերթի է ենթարկել մեկին եւ այդ գործով հետաքննչական գործողություններ են անում: Այնպես է ստացվել, որ այդ վրաերթն էլ վերաբերում է ակցիայի մասնակիցներին: Ակցիայի մասնակիցներին անհանգստություն պատճառելու նպատակով են անում»,- ասաց ակտիվիստը:
Նա չբացառեց, որ ոստիկանությունը ակտիվիստներին պատժելու համար փորձի գործ սարքել իրենցից մեկի վրա` մյուսներին հանգստացնելու նպատակով. «Որեւէ անօրինական գործողություն չի կատարվել: Ճանապարհային ոստիկանության պետն էլ հայտարարեց, որ երթեւեկության կանոններ ակցիայի ընթացքում չեն խախտվել: Ես հիմա մի բան եմ խորհուրդ տալիս ավտոերթի մասնակիցներին, թող ձայնագրեն իրենց զանգահարած ոստիկանության ներկայացուցչին կամ տեսանկարահանեն իրենց տուն այցելած ոստիկանին ու չտրամադրեն որեւէ այլ տեղեկատվություն: Պահանջե’ք փաստաթղթեր եւ հարցերի հիմնավորումներ»:
Հետո ասաց, որ հնարավոր է վաղը նախատեսված մեծ հավաքից առաջ վախեցնելու նպատակով են ոստիկաններն ակտիվացել:
Կարդացեք նաև
Նա ասաց, որ իրենք մի թիմ են եւ թիմով շարունակելու են պայքարել իրենց իրավունքների եւ ոստիկանական գործողությունների դեմ:
Հիշեցնենք, որ երեկ ՀՀ ոստիկանության լրատվության վարչության պետ Աշոտ Ահարոնյանը մեզ հետ զրույցում ակտիվիստների մեքենաների պետհամարանիշները գրանցելու ոստիկանների նախաձեռնության պատճառը չէր բացատրել, ասել էր ` ոստիկաններն իրենց աշխատանքն են արել:
Ոստիկանությունից դեռ չեն պարզաբանում նաեւ ակտիվիստներին զանգելն ու այցելելը եւ տեղեկատվություն հավաքելու պատճառը:
Արփինե ՍԻՄՈՆՅԱՆ
