Արագածոտնում եւ Գեղարքունիքում արական սեռի նորածինների գերակշռությունն այսօր ավելի բարձր է, քան Չինաստանում. այս խնդրի գագաթնակետը 3-րդ եւ 4-րդ երեխաներին է բաժին ընկնում, այսինքն՝ տղա-աղջիկ հարաբերակցությունը 160 տղային 100 աղջիկ է, որը աշխարհում ամենաբարձր ցուցանիշն է: Սա ՄԱԿ-ի բնակչության հիմնադրամի հետազոտության տվյալներն են:
Աղջիկ երեխաներին աբորտ անելու պատճառները շատ են, առաջինը` ինչպես այսօր «Բլից ինֆո» ակումբում ասաց Հայաստանում ՄԱԿ-ի բնակչության հիմնադրամի ղեկավար Գարիկ Հայրապետյանը, ընտանիքի անվան շարունակությունն է, ունեցվածքի փոխանցումը տղային, եւ, ինչպես հայերն են կարծում` տղաները հետագայում իրենց տարեց ծնողների համար ֆինանսական երաշխիք են:
Պարոն Հայրապետյանի ներկայացմամբ` այսօր Հայաստանում մինչեւ 15 տարեկան տղաների թիվը մոտ 40 հազարով գերազանցում է աղջիկների թվին: Տղաների «ավելցուկը» բացասական ազդեցություն կարող է ունենալ հասարակությունում: Օրինակ, պարոն Հայրապետյանի ասելով, այն երկրներում (Հնդկաստան, Չինաստան), որտեղ առկա է կին-տղամարդ անհամամասնությունը, արդեն նկատվում են սոցիալ-տնտեսական բավականին լուրջ խնդիրներ. Չինաստանն ունի մոտ 60 միլիոն տղամարդ, որը Ուկրաինայի բնակչությունից ավելի է, որ միայնակ ծերության է գնում: Կանանց պակասից նաեւ քրեական լուրջ հետեւանքներ են լինում, այսինքն՝ տղամարդկանց ավելցուկից եւ կանանց «քչությունից» երկրում կրիմինալիզացիան 3.8%-ով բարձր է: Գարիկ Հայրապետյանի խոսքերով` «Միայնակ տղամարդիկ ավելի են լինում եւ այն ագրեսիան, որ չեն կարողանում կյանքի բնականոն ընթացքում ապահովել, դա դուրս է գալիս թրաֆիքինգով, սեռական հողի վրա կրիմինալով: Չինաստանում դեպքեր կան՝ մեկ ընտանիքում 4-5 եղբայր մեկ կնոջ հետ են ապրում»:
Հայաստանում սեռով պայմանավորված հղիության արհեստական ընդհատումը, Գարիկ Հայրապետյանի բնորոշմամբ` ավելի շատ կապրիզի է նման. «Տղայից տղա պիտի ծնվի, կամ ոնց կլինի` տղա չունենանք»:
Կարդացեք նաև
Պարոն Հայրապետյանը մի հետաքրքիր փաստ էլ ներկայացրեց. այնպես չէ, որ աղջիկ երեխաներին աբորտ են անում կրթական ցածր մակարդակ ունեցող կամ սոցիալապես անապահով ընտանիքները. հետազոտությունները ճիշտ հակառակ պատկերն են ցույց տվել:
2010 թվականից սեռով պայմանավորված աբորտների թիվը տարեկան հասնում է 29 հազարի, սակայն սա միայն գրանցված թիվն է: Պարոն Հայրապետյանի խոսքերով` կա դեղորայքային արհեստական վիժեցում. Սայտոտեկ դեղամիջոցը հնարավոր է դեղատնից գնել եւ տնային պայմաններում վիժեցում անել, ինչը շատ լուրջ խնդիր է, քանի որ այս դեղամիջոցն ընդունելիս, կանայք հաճախ արնահոսելով տեղափոխվում են հիվանդանոց:
Մանրամասն` տեսանյութում
Արդյոք աբորտների քրեականացումը կնպաստի՞ սեռով պայմանավորված աբորտների քանակի նվազեցմանը՝ հարցին, պարոն Հայրապետյանն ասաց, որ դա հնարավոր է կիրառել միայն արդարադատության շատ վստահելի համակարգի դեպքում: Ըստ Գ. Հայրապետյանի, Հարավային Կորեայում 6 տարի ազատազրկում, կամ էլ 13 հազար դոլարի տուգանք է հասնում սեռով պայմանավորված աբորտի համար. «Մեր նման երկրներում, ես կարծում եմ քրեականացնելը, որեւէ սահմանափակում մտցնելը կարող է բերի կոռուպցիոն ռիսկերի աճի: Իրականում շատ դժվար է ապացուցել, թե ինչի համար արվեց աբորտը, բայց սահմանափակումներ պետք է մտցնել»:
Մանրամասները` տեսանյութում
Խնդրի լուծման մի քանի տարբերակներ կան, նախ սոցիալ-տնտեսական զարգացած համակարգ ապահովելը, աշխատաշուկայում կանանց եւ տղամարդկանց հավասար ապահովումը, մտածելակերպի փոփոխություն եւ այլն.
Նելլի ԲԱԲԱՅԱՆ
