Մաշտոցի պուրակում այսօր տեղի ունեցավ «Դե!մ եմ» թիմի հերթական հանրային քննարկումը: Ակտիվիստներին այսօր միացել էին Հարավկովկասյան երկաթուղու եւ մետրոպոլիտենի 3 հեռացված աշխատակիցները:
Երկաթուղու աշխատակիցների խոսքով՝ իրենց գործատուները վախեցնում են եւ ճնշումներ են գործադրում՝ սպառնալով, որ եթե չստորագրեն եւ չընտրեն պարտադիր կուտակային կենսաթոշակային ֆոնդը, ապա իրենց աշխատանքից կհեռացնեն: Որոշ աշխատակիցներ էլ, չդիմանալով այդ ճնշումնրին, ստիպված արդեն ընտրել են իրենց ֆոնդերը. «Ժողովրդի կեսն էլ չեն իմանում` ի՞նչ անեն, վարկերի տակ են, ստիպված ընտրում են»:
Անգամ աշխատանք կորցնելու սպառնալիքը չի կանգնեցնում աշխատակիցներին. «Եթե դանակը հասել է ոսկորին, մինչեւ վերջ պիտի գնանք»:
Մանրամասն՝ տեսանյութում
Կարդացեք նաև
«Դե!մ եմ» թիմի ակտիվիստ Արտաշես Արաբաջյանը քննարկման ժամանակ հայտնեց, որ կառավարությունն իր ճնշումներով ավելի է հեշտացնում իրենց նախաձեռնության ընթացքը. «Եթե ճնշումները չլինեին, հնարավոր է, որ մեր նախաձեռնությունը այսպիսի թափ չստանար: Դրա վառ ապացույցը երեկվա երթն է: Մեր երթին երեկ նաեւ միացել էին այնպիսի մարդիկ, ում իրենց գործատուները փոխհատուցում են կենսաթոշակայինի գումարը: Սակայն շատ ուրախալի էր տեսնել նրանց մեր շարքերում»:
Մեկ այլ ակտիվիստ՝ Կարեն Հովհաննիսյանն էլ կարծում է , որ մեր հանրապետության 95 տոկոսը դեմ է այս օրենքին. «Եթե մեզ համարում ենք ժողովրդավար երկիր, ապա այս պետության մեջ առաջին ձայնը պետք է լինի ժողովրդինը: Եվ եթե ժողովուրդը իսկապես դեմ է, ապա այս օրենքը չպիտի կյանքի կոչվի: Մենք կոչ ենք անում կառավարությանը եւ գործատուներին չճնշել իրենց աշխատակիցներին, եւ թույլ տալ մարդկանց ինքնուրույն որոշում կայացնել»:
Մանրամասն՝ տեսանյութում.
Էլյա ՀՈՎՀԱՆՆԻՍՅԱՆ
