Թուրքիայի վարչապետ Ռեջեփ Թայիփ Էրդողանն իր «ցավն է կիսել» 1915թ. հայերի հետ տեղի ունեցած դեպքերի համար: Ապրիլի 23-ին նա ցավակցություն է հայտնել հայ սերունդներին, որոնց նախնիներն իրենց կյանքն են կորցրել «20-րդ դարասկզբին»:
«Հուրիեթ»-ի փոխանցմամբ, վարչապետի գրասենյակի տարածած հաղորդագրությունում ասվում է, որ ապրիլի 24-ը «շատ կարևոր նշանակություն ունի մեր հայ քաղաքացիների և ամբողջ աշխարհի հայերի համար»:
Նա նշել է, որ Օսմանյան Կայսրության վերջին տարիներին բոլոր ազգերն են ծանր ապրել և կոչ է արել մարդասիրական մոտեցում ցուցաբերել ու կիսել նրանց վիշտը:
«Առաջին համաշխարհային պատերազմի ժամանակ տեղի ունեցած դեպքերը մեր ընդհանուր ցավն է: Մարդկային և գիտական պատասխանատվություն է՝ պատմության այս ցավալի փուլը գնահատել արդար հիշողությամբ», – հայտնել է վարչապետը:
Կարդացեք նաև
Էրդողանն անդրադարձել է նաև խոսքի ազատության իրավունքի և պատմության նկատմամբ բազմակարծության հարգանքի կարևորությանը՝ նշելով, որ 1915թ. իրադարձությունների մասին պետք է ազատ խոսվի Թուրքիայում:
«Հույս ունենք, որ այն հայերը, որոնք իրենց կյանքն են կորցրել 20-րդ դարասկզբի ենթատեքստում, խաղաղությամբ կհանգչեն, և մենք մեր ցավակցությունն ենք հայտնում նրանց թոռներին», – ասված է հաղորդագրության մեջ, որը հրապարակվել է 8 լեզուներով, այդ թվում՝ արևելյան և արևմտյան հայերենով:
Պատրաստեց Հովհաննես ԻՇԽԱՆՅԱՆԸ
