Երեկ գնում էի ուրախ միջոցառման ու ճանապարհին տեսա, որ փողոցներից մեկի երկայնքով (կարեւոր չէ, թե որ) ինչ-որ երիտասարդներ սեւ ժապավեններ են կապում, մի քանի տղամարդ էլ վերամբարձ կռունկ են բերել ու փորձում են վերեւով՝ մայթից մայթ սգապաստառ փակցնել, որտեղ գրված է երիտասարդ մահացած մեկի տարիքը, անունը, անգամ կոտրված մեխակ է նկարված: Անկեղծ ասած, ինձ դուր չեն գալիս մեռելապաշտության նման դրսեւորումները:
Գիտեմ նաեւ, որ բոլոր տաղավար տոներին հաջորդում են մեռելոցները, բայց վերջին տարիներին դրանց պետականորեն տրված առանձնահատուկ նշանակությունը, ոչ աշխատանքային օրը հայտարարելը եւ այլն, մի տեսակ բացասական վերաբերմունք է դրսեւորել շատերի շրջանում:
Տա Աստված, որեւէ մեկը երիտասարդ տարիքում հարազատներ չկորցնի, իսկ եթե ճակատագրի բերումով նման բան է պատահել, ինչո՞ւ այդ վիշտը պարտադրել նաեւ ուրիշներին, անգամ փողոցով պատահաբար անցնող օտարին: Ի վերջո կյանքն ու մահը հավերժական ուղեկիցներ են ու կողք կողքի ապրող հարեւաններ: Մի անկյունում կարող է հարսանիք լինել, մյուսում՝ հոգեհանգստյան արարողություն: Շիրիմներ զարդարելն ու գեղեցկացնելն ո՞ւմ է պետք, ի՞նչ է տալիս դա հանգուցյալին: Դրա փոխարեն կարելի է կենդանության օրոք մարդուն հարգել, պատվել, չզլանալ դրական զգացողություններ առաջացնող պահեր նվիրել, չչարանալ միմյանց հանդեպ, լինել ավելի լայնախոհ շատ հարցերում:
Ցավոք, հաճախ տխուր արարողությունների ու առիթների շուրջն ենք միավորվում, դրա համար էլ տոնի զգացողությունն է պակասում անգամ «պաշտոնական» տոնական օրերին: Հատուկ հետեւել եմ՝ տոն օրերին դժգոհ դեմքով ու բացակա հայացքով մարդիկ չեն պակասում:
Կարդացեք նաև
Հատկապես նոր սերնդին պետք է տոնի ու դրականի հանդեպ սեր ներարկել, իհարկե նաեւ թանկ հիշատակների հանդեպ՝ հարգանք: Մեզ հաղթականության ոգին է պակասում, եւ սա այն դեպքում, երբ Արցախամարտում հաղթանակ տարած ժողովուրդ ենք, մեր պատմության էջերում բազում հաղթանակներ կան, բայց վերցրել ու միայն «սեւ» էջերն ենք փորփրում՝ լուսավորները թողած:
Գուցե տեղին չէ, այս գրառման մեջ հետեւյալ նախադասությունը զետեղելը, բայց, ես ուզում եմ, որ Հայոց ցեղասպանությունը ճանաչվի, դատապարտվի, փոխհատուցվի, սակայն բնավ չեմ ցանկանում, որ աշխարհը մեզ ճանաչի միայն ցեղասպանությամբ: Թող Հայաստանն ու հայերը ուրիշների մտապատկերում զուգորդվեն փառահեղի, հաղթականի, հաջողությունների, արժանապատիվի ու դրականի հետ:
Գոհար ՀԱԿՈԲՅԱՆ
Լուսանկարը՝ hetq.am-ի
Միանում եմ՝վիշտդ ուրիշներին մի փաթաթիր-ուախությունդ կիսիր բոլորի հետ: