Այս պահին կառավարության շենքի առջեւ Գեղարքունիքի մարզի Վարդենիկ գյուղի բնակիչները բողոքի ակցիա են անցկացնում: 17-ամյա տղաներ Աբրահամ Շահինյանի, Արկադիկ Պողոսյանի եւ Մեսրոպ Գրիգորյանի ծնողները, հարազատները, ընկերներն ու հարեւանները «Արժանապատվությունը խուլիգանություն չէ», «Ազատեք մեր դասընկերներին», «Ոչ թե բանտ, այլ բանակ», «Մի խեղեք մեր ապագա զինվորի ճակատագիրը» պաստառներով վարչապետից, դատախազից եւ արդարադատության նախարարից պահանջում են ձերբակալված տղաների նկատմամբ արդար դատ:
Վարդենիկի ավագ դպրոցի տղաները ձերբակալվել են այն բանի համար, որ սեռական բնույթի հայհոյանք տվող ուսուցչի հետ վիճել են:
Տղաների ծնողները հայտնեցին, թե ուսուցիչն ինքն է հրահրել վիճաբանությունը եւ ինչպես ասաց Աբրահամ Շահինյանի հայրը՝ ուսուցիչ Սեւակ Բադալյանը բառի ուղիղ իմաստով տղաներից մեկին մայր է հայհոյել, տղաները փորձել են կարգի հրավիրել իրենց ուսուցչին, որից էլ ծագել է վեճը:
Ձերբակալված տղաների ծնողները վստահեցնում են, որ Բադալյանը դպրոցի տնօրենի եղբայրն է եւ սպառնացել է, թե որքան էլ բողոքեն, միեւնույն է, ինքը պառլամենտում մեծ ծանոթություններ ունի եւ տղաներին նստացնելու է:
Կարդացեք նաև
Այս պահին ՀՀ վարչապետ Հովիկ Աբրահամյանի մոտ հանդիպման են տղաների ծնողները:
Մանրամասները՝ ավելի ուշ:
Նելլի ԲԱԲԱՅԱՆ
Լուսանկարը՝ panorama.am-ի
