Ռուսաստանի նախագահ Վլադիմիր Պուտինը Ղրիմի թաթարների համայնքի հետ հանդիպման ժամանակ նշել է, որ թաթարներին Ղրիմի բնիկներ ճանաչելու հարցի շուրջ կարելի է մտածել, սակայն որոշում կայացնելուց շատ զգույշ պետք է լինել:
Թաթարներին Ղրիմի բնիկներ օրենքով ճանաչել առաջարկել է ազգային շարժման վետերան Այդեր Մուստաֆաևը: Գրում է «Ռիա Նովոստին»-ն:
«Դրա մասին կարելի է մտածել: Բայց այդ խնդիրը լուծելով՝ չպետք է մեկ այլ խնդիր ծնենք, – ասել է Պուտինը մայիսի 16-ին կայացած հանդիպմանը՝ բացատրելով, որ Ղրիմի բնիկ ճանաչվելու իրավունք ունեն նաև հույները, որոնք նույնպես բռնաճնշումների են ենթարկվել,- Նրանք մեզնից ու ձեզնից ավելի վաղ են այնտեղ եղել: Դրա համար մենք պետք է շատ զգուշորեն մոտենանք այդ հարցին: Եթե դուք մտավախություն ունեք, որ իմ ստորագրած հրամանագիրը (Խորհրդային տարիներին բռնադատված Ղրիմի թաթարների արդարացման մասին), բացարձակ երաշխիք չէ, ապա կարելի է մտածել, թե ինչ կարելի է անել, որ նման մտահոգություններ չառաջանան: Ես պատրաստ եմ ձեզ հետ միասին մտածել», – ասել է Պուտինը:
Պատրաստեց Հովհաննես ԻՇԽԱՆՅԱՆԸ
