Իրանցի դերասանուհի Լեյլա Խաթամին զայրացրել է Իրանի իշխանություններին՝ համբուրելով Կաննի կինոփառատոնի նախագահ Ժիլ Ժակոբի այտը: Այդ գործողությունը դիտարկվել է վիրավորանք՝ հասցված իսլամական հանրապետության կանանց բարոյականությանը, գրում է «Նյուզռու»-ն՝ հղում անելով «Ալ-Արաբիա»-ին:
Լուսանկարը, որտեղ Խաթամին համբուրում է Ժակոբին, հրապարակվել է իրանական լրատվամիջոցներում, այն մեկնաբանել է Իրանի մշակույթի փոխնախարար Հոսեյն Նուշաբադին. «Նրանք, ովքեր մասնակցում են միջազգային միջոցառումներին, պետք է շատ զգույշ լինեն իրանցիների համբավը և բարեպաշտությունը չվնասելու համար, չի կարելի իրանցի կանանց աշխարհի առաջ վատ լույսի ներքո ցուցադրել», – ասել է նա՝ ավելացնելով, որ փառատոնին Խաթամիի ներկայությունը «անպարկեշտ» է և «հակասում է մեր կրոնական համոզմունքներին»:
Լեյլա Խաթամին այս տարվա Կաննի փառատոնի ժյուրիի անդամներից է: Նա հայտնի է դարձել Ասղար Ֆարհադիի նկարահանած «Նադերի և Սեմինի ամուսնալուծությունը» ֆիլմով, որը 2012թ. օսկարի է արժանացել որպես լավագույն օտարալեզու ֆիլմ:
Պատրաստեց Հովհաննես ԻՇԽԱՆՅԱՆԸ
