Ըստ փոխքաղաքապետ Արամ Սուքիասյանի, դպրոցների տնօրենների անունով չորս դիմում է ստացվել
Aravot.am-ը Երեւան քաղաքի քաղաքապետի տեղակալ Արամ Սուքիասյանից հետաքրքրվեց՝ քաղաքապետարանը նամակներ, դժգոհություններ կամ դիմումներ ստացե՞լ է իր ենթակայությամբ գործող դպրոցների աշխատակիցներից, որոնք դիմել են աշխատավարձից կուտակային վճարներ չհաշվարկելու խնդրով:
Պարոն Սուքիասյանը տեղեկացրեց, որ քաղաքապետարանը նման բովանդակությամբ ոչինչ չի ստացել: «Եթե կա դիմում որեւէ ուսուցչի կողմից, ապա դա պետք է լինի իր տնօրենին, եւ իսկապես ունենք այդպիսի մի քանի դեպք: Իմ տեղեկություններով ուսուցիչներից նման չորս դիմում է եղել իրենց դպրոցների տնօրենների անունով»,- հայտնեց փոխքաղաքապետը:
Aravot.am-ը մեկնաբանություն է խնդրել նաեւ ԿԳ նախարարությունից, որը կներկայացնենք ստանալուն պես:
Կարդացեք նաև
Ավելի վաղ տեղեկացրել էինք , որ «Կուտակային կենսաթոշակների մասին» ՀՀ փոփոխված օրենքի 3-րդ հոդվածի համաձայն՝ կուտակային կենսաթոշակի մասնակիցներն իրավունք ունեն դիմում ներկայացնել գործատուներին՝ աշխատավարձից կուտակային վճարներ չհաշվարկելու և չփոխանցելու մասին, սակայն դպրոցների տնօրենները կամ հրաժարվում են ընդունել դիմումները՝ պատճառաբանելով, թե «վերեւից» համապատասխան հրահանգ չունեն, կամ ընդունում են դրանք ու ընթացք չեն տալիս:
Գոհար ՀԱԿՈԲՅԱՆ
