Թե ինչ հրաշալի բան է Եվրասիական տնտեսական միությունը ու ինչ չքնաղ ապագա է սպասվում այդ միությանը անդամագրվողներին՝ այսօր «Նովոստի» մամուլի միջազգային կենտրոնում բացատրում էին «Օդնակո. Եվրազիա» պորտալի գլխավոր խմբագիր Սեմյոն Ուրալովը, «Բելոռուսսկայա դումկա» ամսագրի գլխավոր խմբագիր Վադիմ Գիգինը՝ «Եվրասիական ինտեգրում. Արդիական հարցեր» թեմայով ասուլիսի ժամանակ։
Սեմյոն Ուրալովը, մասնավորապես, ասում էր, որ Հայաստանի համար պատմական շանս է ստեղծվել՝ միանալ Եվրասիական տնտեսական միությանը՝ որպես առաջիններից մեկը, ինչը շահեկան վիճակում կդնի նրան՝ ի տարբերություն ավելի ուշ «խելքի եկողների». «Հայաստանը շատ ճիշտ արագ տեմպ է վերցրել, եւ անցել է անգամ Ղրղըզստանին, որը շատ ավելի վաղուց էր այս միությանն ինտեգրվում»: Նա ներկայացրեց իր պատկերացմամբ երեք կարեւորագույն սկզբունքներ, որոնց պետք է հետեւի Հայաստանը՝ հաջողությունների հասնելու համար: Դրանցից առաջինը, ըստ նրա, տրանզիտային ինտեգրացիան է, այսինքն՝ Ռուսաստան-Վրաստան-Հայաստան, իսկ այնուհետեւ՝ Իրան, երկաթուղային ճանապարհի վերականգնումը: Դրա համար անհրաժեշտ է, որ Վրաստանը բացի իր երկաթուղին եւ ռուսական գնացքները անարգել հասնեն Հայաստան, ապա՝ Իրան: Ու այդ նպատակին հասնելու ճանապարհը, ըստ Ուրալովի՝ հայկական հզոր լոբբին է, որը պետք է աշխատի եւ Մոսկվայում, եւ Թբիլիսիում, եւ Եվրոպայում եւ ԱՄՆ-ում, ու հասնի նրան, որ ռուսական գնացքները նույն ձեւով մտնեն Հայաստան, ինչպես գնում են դեպի Կալինինգրադ:
Հաջորդ առանցքային հարցը, որ պիտի լուծի Հայաստանը՝ նոր արդյունաբերության ստեղծումն է: Դրա համար Հայաստանը պետք է ծրագրեր կազմի եւ նոր գործընկերների հետ՝ ՌԴ, Բելառուս եւ Ղազախստան, հասնի դրանց իրականացմանը. «Եթե դուք չգծեք ձեր ծրագրերը, ոչ ոք ձեր փոխարեն դա չի անելու: Պետք է հասկանալ, թե ինչ տնտեսություն եք ուզում, ինչ արդունաբերություն եք ուզում, պրոյեկտներ կազմել եւ սկսել ստեղծել»: Եվ վերջապես երրորդը՝ միջռեգիոնալ կապերի հաստատում՝ Հայաստանը պետք է հսկայական ռուսական շուկայից ընտրի կոնկրետ ռեգիոն, որի հետ ուզում է աշխատել եւ գնալ ռեգիոնալ համակարգված աշխատանքների, ինչը շատ արագ արդյունք կբերի:
Ըստ Ուրալովի՝ եթե այս երեք առանցքային կետերի շուրջ Հայաստանը կարողանա քայլեր ձեռնարկել, ապա ընդամենը երկու-երեք տարուց ՀՀ բնակիչները իրենց մաշկի վրա կզգան առաջընթացը:
Կարդացեք նաև
Մելանյա ԲԱՐՍԵՂՅԱՆ
Ցանկացած միությունում Հայաստան հաջողություն կունենա,եթե սպառողից դառնա արտադրող..