Էրեբունի եւ Նուբարաշեն վարչական շրջանների ընդհանուր իրավասության դատարանում մեկ տարի առաջ սկսվել է 33-ամյա Գոռ Պոլեյանի դեմ քրեական գործով դատաքննությունը:
Դատական հերթական նիստը նշանակվել է հունիսի 25-ին: Որեւէ անգամ այս գործով դատական նիստը չի լուսաբանվել:
Գյումրեցի Գոռ Պոլեյանը մեղադրվում է 6 տարի առաջ մարտի 4-ին Էրեբունի համայնքի Երկաթուղայինների փողոցի փռի մոտ հրազենով Արսեն Գալստյանին սպանելու համար:
Ըստ մեղադրանքի կողմի, նա «ինքնությունը չպարզված մի խումբ անձանց» հետ «պարզաբանումներ» պահանջելու նպատակով, վրդովվելով իր եւ իր ընկերների հասցեին Ա.Գալստյանի հնչեցրած սպառնալիքներից, ավտոմեքենան ընթացքի դնելու պահին ատրճանակից արձակել է կրակոցներ:
Ա.Գալստյանի մեքենայում, նախնական վարկածներից մեկի համաձայն, գտնվել է թաղապետ Մհեր Սեդրակյանի ազգականը:
Արսեն Գալստյանը, ըստ գործի նյութերի, մահացել է ձախ ծոծրակային շրջանում ստացած վնասվածքից:
Կարդացեք նաև
Օգոստոսի 7-ին Արսենը մահացել է:
2,5 տարի է, ինչ Գոռը գտնվում է անազատության մեջ:
Նա պահվել է արդարադատության նախարարության «Նուբարաշեն» քրեակատարողական հիմնարկում, ապա՝ այս տարվա հունվարից՝ «Դատապարտյալների հիվանդանոցում»:
Անցյալ տարվա դեկտեմբերի 30-ին «կտրել են» կալանավորի թոքը, «Սուրբ Գրիգոր Լուսավորիչ» բժշկական կենտրոնում վիրահատել են նրան:
Կալանավորի մայրը Aravot.am-ի հետ զրույցի ժամանակ ասաց, որ որդին չի ճանաչել սպանվածին, նա իրեն մեղավոր չի ճանաչում, իսկ դեպքի օրն էլ նա Երեւանում չի գտնվել:
Նախկինում Գոռը «աշխատեցրել է» «Կայարան» տաքսի սերվիսը: Նրա պաշտպանությունն իրականացնում են երեք փաստաբաններ՝ Թադեւոս Ալեքսանյանը, «Լեւ Գրուպ» իրավաբանական գրասենյակի փաստաբանն ու Արմեն Ումրշատյանը:
Դատապարտյալների հիվանդանոցի թոքախտաբանական բաժնի պետ, արդարադատության կապիտան Դ.Հարությունյանն այսօր տեղեկանք էր տրամադրել կալանավորի պաշտպանական կողմին:
Ըստ պաշտոնական տեղեկանքի, հիվանդի վիճակը միջին ծանրության է, գանգատները կապված են ընդհանուր հիվանդությունների հետ, ստանում է կոմպլեքս բուժում շաքարային դիաբետի հետ կապված:
Նրա ձախ թոքը քայքայված է:
Ռուզան ՄԻՆԱՍՅԱՆ
