Այսօր՝ հունիսի 24-ին, Աֆրիկյանների ակումբի շենքի ապամոնտաժման դեմ պայքարողներին միացել էր աշխարհահռչակ երաժիշտ Տիգրան Համասյանը: Նախատեսված էր, որ երաժիշտը պետք է համերգով ներկայանար շինարարության վայրում, սակայն ոստիկանները պատ կազմելով թույլ չտվեցին, որ դաշնամուրը ներս մտցնեն:
Երաժշտական գործիքը ներկաները տեղադրեցին շինհրապարակից դուրս: Մինչ թիթեղյա պարիսպներից ներս քանդվում էր Աֆրիկյանների ակումբի շենքը, Համասյանը նվագում էր դաշնամուր՝ ի նշան բողոքի:
Կարդացեք նաև
Նա ներկաներին դիմեց. «Գիտե՞ք ինչի եմ եկել»: «Պայքարին միանալու»,- լսվեց հանդիսատեսի կողմից: «Չէ, մի կարեւոր բան կա. պետք է չմոռանանք իրար սիրել, կարող է պարզ հնչել, բայց համենայն դեպս ամենավերջում, ամենակարեւոր բանը դա է, ու բնականաբար պատմություն կա էս շենքի հետ ու այդ պատմությունը պետք է պարզապես հարգել, սիրել, մարդիկ ինչ են արել երկու տարի առաջ, պետք է իրար հասկանալ».- ասաց նա: Նրա խոսքն ընդմիջվեց աղմուկող, քաղաքացիները հարվածում էին թիթեղյա պարիսպներին, նայելով աղմուկի կողմը՝ ասաց. «Համենայն դեպս, որ Կոմիտասը լիներ, չէր ուզի, որ նման բան լիներ:
Հռիփսիմե ՀՈՎՀԱՆՆԻՍՅԱՆ
