Էլեկտրաէներգիան թանկացնելուց հետո Հանրային ծառայությունները կարգավորող հանձնաժողովը պատրաստվում է հուլիսի 9-ին անդրադառնալ մայրաքաղաքի եւ հարակից մի քանի շրջանների խմելու ջրի սակագնի խնդրին։ Ի տարբերություն հոսանքի, ջրամատակարարման գինը կմնա նույնը։
Չնայած նրան, որ դեռեւս տարեսկզբին «Երեւան ջուրը» սակագների ճշգրտման հայտով առաջարկել էր թանկացնել ջրամատակարարման-ջրահեռացման ծառայությունը, այնուհանդերձ հանձնաժողովը հակված է հերթական տնտեսական տարվա համար այն թողնել անփոփոխ։ Խոսքը, սակայն, բացառապես բնակչությանը մատուցվող ծառայությունների մասին է։ Այլ բաժանորդների դեպքում սակագները կշարունակեն բարձրանալ։
Այսպես. տրված լիազորությունների շրջանակներում, դեռեւս փետրվարին «Երեւան ջուրը» հայտ էր ներկայացրել Հանրային ծառայությունները կարգավորող հանձնաժողովին՝ ակնկալելով ջրամատակարարման-ջրահեռացման ծառայությունների սակագների բարձրացում։ Ընդ որում՝ բոլոր բաժանորդների, այդ թվում՝ նաեւ բնակչության համար։
Մինչ այդ, ինչպես հայտնի է, բնակչության սակագները նվազել էին. 174 դրամից անցած տարի այն դարձավ 170 դրամ։
Այս անգամ ընկերությունը կրկին սակագները ճշգրտել էր թանկացման ուղղությամբ։ Ընդ որում՝ դրա հիմնական պատճառաբանությունը համարվել էր 5,8 տոկոսանոց գնաճը։ Այդ գործոնը, «Երեւան ջուր» ընկերության մասնագետների գնահատմամբ, սակագների վրա թողել է շուրջ 8 դրամի ազդեցություն։
Կարդացեք նաև
Երբ որոշվեց օգոստոսի 1-ից թանկացնել էլեկտրաէներգիան, ենթադրվում էր, որ ջրամատակարարման սակագների բարձրացման առումով ճնշումը կմեծանա։ Իրականում այդպես էլ կա, սակայն հանձնաժողովը մտադիր է բնակիչ-բաժանորդների համար առայժմ այն թողնել անփոփոխ։
Վասակ ԹԱՐՓՈՇՅԱՆ
Հոդվածն ամբողջությամբ՝ «Հայոց աշխարհ» թերթի այսօրվա համարում
