Այս պահին ՀՀ վարչական դատարանում քննվում է ՀՀ ոստիկանության հայցը՝ ընդդեմ Նախախորհրդարանի անդամ Վարդան Գերավետյանի (նախագահող դատավոր՝ Արման Թովմասյան): Հայցը վերաբերում է 2013-ի օգոստոսի 24-ին Կոմիտաս 5-ի շարժման ընթացքում տեղի ունեցած դեպքերին:
Դատարանի դահլիճում ՀՀ ոստիկանության ներկայացուցիչ Մարթա Մելիքսեթյանը հայտարարեց, որ ոստիկանության ծառայողի օրինական պահանջը չկատարելու պատճառով պահանջում են պատասխանատվության ենթարկել Վարդան Գերավետյանին:
Նշենք, որ ոստիկանության ներկայացուցչի առարկության պատճառով դատարանի դահլիճում արգելվեց լրագրողներին տեսանկարահանումներ իրականացնել դռնբաց դատական նիստի ընթացքում:
Ոստիկանության ներկայացուցիչը պատճառաբանեց, թե տեսալուսանկարահանումն իր անձնական կյանքին է բացասաբար անդրադարձել, այդտեղ իրեն վարկաբեկելու միտում է տեսնում:
Վարդան Գերավետյանի ներկայացուցիչ Տիգրան Եգորյանը սա որակեց որպես «մերկապարանոց և անհիմն» հայտարարություն և մանրամասնեց. «Մարթա Մելիքսեթյանը աշխատավարձ է ստանում հանրության կողմից հավաքվող հարկերի արդյունքում ձևավորված պետբյուջեի հատկացումներից: Եթե իր աշխատանքային պարտականությունները նա վատ է կատարում և խուսափում է հրապարակայնությունից, դա իր խնդիրն է: Նա դատավարության պրոֆեսիոնալ մասնակից է, հանրությանը չի մտահոգում նրա կաշկանդվելու հանգամանքը: Նա պիտի ունակ լինի անգամ վրդովեցնող հրապարակումները տանել՝ որպես հանրային ծառայող ու պետական ներկայացուցիչ: Ուստի դատարանը կողմին չկաշկանդելու, նրա աշխատանքային պարտականությունների կատարման համար ավելի լավ պայմաններ ստեղծելու պատճառաբանությամբ ուղղակի իրավունք չունի տեսալուսանկարահանումը դատական դահլիճում արգելել»:
Կարդացեք նաև
Տաթև ՀԱՐՈՒԹՅՈՒՆՅԱՆ
