Դավիթ Սանասարյանը համարում է, որ հայ ժողովուրդը մտահոգված է Հայաստանի ներկայիս իրավիճակի մասին
«Մեր արտաքին քաղաքականությունը ձախողված է»,- այսօր՝ հուլիսի 18-ին, «Ֆորում» մամլո ակումբում լրագրողների հետ հանդիպման ընթացքում հայտարարեց «Բարեւ Երեւան» դաշինքի անդամ Դավիթ Սանասարյանը:
Նրա խոսքերով՝ դա ներքին քաղաքականության ձախողվածության արտացոլանքն է: Նրա կարծիքով՝ տարիներ շարունակ իշխանությունները իրար հաջորդելով զիջել են Հայաստանի Հանրապետության արտաքին քաղաքականությունը միջազգային հարաբերություններում: Նա հիշեցրեց, որ Հայաստանը ՀԱՊԿ անդամ է, նա հռչակել է, որ դաշնակից է Ռուսաստանի Դաշնությանը, սակայն ՌԴ-ն, հաշվի չառնելով, որ տարածաշրջանում լարված իրավիճակ է, ռազմական աջակցություն է ցուցաբերում Ադրբեջանին.
«Մեր իշխանությունները սրա մասին տարիներ շարունակ գրեթե չեն խոսել, ուղղակի մեկնաբանել են, որ Ռուսաստանի գործողությունները իր բիզնես շահն են: Վերջերս մենք ականատես եղանք, որ Սերժ Սարգսյանը խոսեց ժողովրդի անունից, եւ ասաց, որ ժողովուրդը մտահոգված է: Իրականում, այդ մտահոգությունը տարիներ շարունակ կա, եւ լավ չէ, որ այսքան տարիներ հետո նոր խոսվում է այդ մտահոգության մասին»:
Դավիթ Սանասարյանը համարում է, որ այդ մտահոգությունը Հայաստանի Հանրապետության ներկայիս իրավիճակի, իշխանությունների մասին, որոնք ըստ նրա՝ ոչ միայն ձախողել են արտաքին քաղաքականությունը, այլեւ չեն կարողացել որեւէ բարեփոխում կատարել երկրի ներսում: Նրա խոսքերով՝ այս պարագայում այլ բան չի մնում, քան աշնանը քաղաքական ընդդիմությունների հետ միասնական լուծում տալ, այսինքն՝ իշխանափոխություն կատարել: Խնդրի այլ լուծում նա չի տեսնում:
Կարդացեք նաև
Ի տարբերություն Դավիթ Սանասարյանի՝ սոցիոլոգ Ահարոն Ադիբեկյանը համարում է՝ ընկերությունը՝ ընկերություն, գործը՝ գործ.
«Գուցե մեր նախագահը դրան նորմալ է վերաբերում: Տարբերություն չկա, թե 3 միլիարդի զենքը Ադրբեջանը որտեղից կառնի, կարեւորը դրանք օգտագործելն է, որ մենք կարողանանք չեզոքացնել»:
Ամի ՉԻՉԱԿՅԱՆ
