Վարչապետի պաշտոնում նշանակվելուց հետո Հովիկ Աբրահամյանը որոշել է վերանայել իր կենսակերպը: «Առավոտի» տեղեկություններով՝ վարչապետը, որը Ազգային ժողովի նախագահ եղած տարիներին կուսակցական քեֆ-ուրախությունների ակտիվ մասնակիցն էր, հաճախ նաեւ կազմակերպիչը, այժմ որոշել է այլ քաղաքականություն վարել. Հովիկ Աբրահամյանն այլեւս հրաժարվում է «ամեն տեսակ» կուսակցական քեֆերին մասնակցելուց: Նա ընդունում է բացառապես պաշտոնական ընդունելությունների հրավերները:
Հովիկ Աբրահամյանի սույն կեցվածքի համար երկու պատճառաբանություն կա: Պատճառաբանություն առաջին՝ իշխանական որոշակի շրջանակներում խոսվում է այն մասին, որ այսպիսով վարչապետը ցանկանում է «պորտալարը կտրել» խոշոր եւ միջին օլիգարխիայից, որպեսզի կարողանա ինչ-որ չափով գոնե կյանքի կոչել իր իսկ հռչակած ծրագրի կարեւորագույն դրույթը՝ ստվերի դեմ պայքարը:
Հիշեցնենք, որ հուլիսի մեկից, ըստ Հովիկ Աբրահամյանի կառավարության ծրագրի, ստվերի դեմ պայքարի շրջան է մեկնարկել Հայաստանում: Ավելի վաղ Վերահսկիչ պալատի նախագահ Իշխան Զաքարյանը խորհրդարանում սկանդալային հայտարարություն էր արել՝ ասելով, որ պետբյուջեի 70 տոկոսն անարդյունավետ է ծախսվում: Ավելի հանրամատչելի լեզվով ասած՝ ի հեճուկս ընդդիմադիր քաղաքական ուժերի ու գործիչների այն հայտարարությունների, որ Հայաստանում, պաշտոնական թվերով, ստվերը 50 տոկոս է կազմում, Իշխան Զաքարյանն ասաց, որ Հայաստանում ստվերը 70 տոկոս է:
Պատճառաբանություն երկրորդ՝ նույն իշխանական շրջանակներում շրջանառվող խոսակցությունների համաձայն, վարչապետի՝ կուսակցական քեֆ-ուրախություններին ընտրովի մոտեցումը նկատելի էր դեռ հետընտրական շրջանում, երբ ընտրությունների ժամանակ ՀՀԿ-ին ծառայած հասարակական շրջանակների՝ բժիշկներ, ուսուցիչներ եւ այլն, մարզային երախտիքի երեկոներից Հովիկ Աբրահամյանը ոչ բոլորին մասնակցեց: Ժամանակին սա բացատրվում էր անձնական հակա եւ համակրանքներով:
Կարդացեք նաև
Հովիկ Աբրահամյանի՝ վարչապետի պաշտոնում նշանակվելուց հետո կառավարությունում եւս մի կարգ է «վերանայվել», որ, ի դեպ, արարողակարգի խախտում է: Ըստ արարողակարգի՝ երբ վարչապետը երկրից մեկնում է պետական կամ պաշտոնական այցով, նրան օդանավակայանում պետք է ճանապարհեն նախարարները: Իբրեւ վարչապետ՝ Հովիկ Աբրահամյանի առաջին այցը ՌԴ, Սոչի, աչքի ընկավ հենց դրանով: Օդանավակայանում վարչապետին ճանապարհում էին միայն փոխվարչապետ Արմեն Գեւորգյանը եւ կառավարության աշխատակազմի ղեկավար-նախարար Դավիթ Հարությունյանը: Մեր աղբյուրի փոխանցմամբ՝ վարչապետը հատուկ նպատակ չի ունեցել արարողակարգ խախտելու եւ ոչ էլ «խնայել» է սեփական նախարարներին, պարզապես ցանկացել է «ավելորդ շքեղություններից» խուսափել: Մինչդեռ Տիգրան Սարգսյանի վարչապետության օրոք, ականատեսների պատմելով, շատ նախարարներ անգամ խորհրդակցություններ են ընդհատել, մարզային հանդիպումներ կիսատ թողել՝ սիրելի վարչապետի ետեւից թաշկինակ թափահարելու համար:
ՆԵԼԼԻ ԳՐԻԳՈՐՅԱՆ
«Առավոտ» օրաթերթ
01.08.2014
Ինքն իր պորտալաը ոնց կտրի??????????????????????
Ստերի սուտն է…
Եվ այդ սուտը ջրի երես դուրս կգա…
Ինչպես ինքն է հաճախ կրկնում` դրա համար ,,ժամանակ է պետք,,…
Երկրի կոծանումը ապվարտին հասցնելու համար ժամանակ է պահանջում…