ԱԺ ՀՀԿ խմբակցության պատգամավոր Մանվել Բադեյանը ԱԻՄ առաջնորդ Պարույր Հայրիկյանի հացադուլն ու վանքերում աղոթելը համարում է «Էքսցենտրիկ, անտրամաբանական քայլ»:
«Անհասկանալի պահվածք է դրսեւորում Պարույր Հայրիկյանը: Նրա հացադուլը ոչ ոքի չի հետաքրքրում»,-ասաց պարոն Բադեյանը:
Նա նախագահ Սերժ Սարգսյանի հրաժարականի հարցը ժողովրդական պահանջ չի համարում.« Եթե ժողովրդական պահանջ լիներ, ժողովուրդը նրա հետ հացադուլի նստած կլիներ, բայց ժողովուրդը նորմալ ժողովուրդ է, դրա համար էլ չի նստում հացադուլի»:
ԱԺ ՀՀԿ խմբակցության պատգամավոր Կարեն Ավագյանին Սերժ Սարգսյանի հրաժարականի պահանջով Պարույր Հայրիկյանի սկսած հացադուլը զարմացրել է: «Առաջին անգամ եմ լսում, որ հացադուլ է սկսել, բայց մինչեւ հացադուլի սկսելն էլ այլ միջոցներ էր ձեռնարկում հրապարակներում մարդ հավաքելու համար: Տեսել ենք` ինչպես էր հավաքում, քանի մարդ էին լսում Պարույր Հայրիկյանին: Պատահական էլ չէ, որ չեմ լսել այդ հացադուլի մասին, որովհետեւ չեմ կարծում, որ քաղաքական դաշտում պարոն Հայրիկյանը հետաքրքրություն է ներկայացնում: Վաղուց Հայաստանն անցել է այն ժամանակահատվածը, որ մանիպուլյացիաներով, շանտաժով փորձելու են ամրապնդել իրենց համար քաղաքական նոր դիրք, որոշակի քաղաքականություն՝ իրենց անձնական շահերը սպասարկելու համար»,- ասաց Կ.Ավագյանը:
Կարեն Ավագյանը նաեւ հակադարձեց պարոն Հայրիկյանի պնդմանը, թե Սերժ Սարգսյանի հրաժարականի հարցը ժողովրդական պահանջ է.«Բացարձակ ոչ, ո՞վ կարող է նման գործառույթ վերցնել իր վրա, ասել, թե ժողովրդական պահանջ է: Ընդհակառակը` ժողովրդի պահանջն է, որ այն քաղաքականությունը, որ Սերժ Սարգսյանն իրականացնում է, նույն ոգով շարունակի: Հայաստանում ընտրությունները հստակ են, օրերը ֆիքսված են, պարոն Հայրիկյանը պետք է փորձի լավագույնս տեղավորվել օրենսդրական նման ձեւաչափերի մեջ: Լուրջ քաղաքականության համար պետք է
ժամանակակից մեթոդներ ու մեխանիզմներ կիրառեն օրենքի տառին ու ձեւին համապատասխան»:
Կարդացեք նաև
Արփինե ՍԻՄՈՆՅԱՆ
